குடியுரிமை திருத்தச் சட்ட எதிர்ப்பு: தவ்ஹித் ஜமாஅத் அமைப்பு சார்பாக சிறைநிரப்பும் போராட்டம்!

நாகை: குடியுரிமை திருத்தச் சட்டத்தை திரும்ப பெற வலியுறுத்தி தமிழ்நாடு தவ்ஹித் ஜமாஅத் அமைப்பு சார்பாக நாகை அவுரி திடலில் சிறைநிரப்பும் போராட்டத்தில் ஆயிரத்திற்கும் மேற்பட்டோர் பங்கேற்று கண்டன கோஷங்களை எழுப்பினர்.

மத்திய அரசு கொண்டுவந்துள்ள குடியுரிமை திருத்தச் சட்டத்தை திரும்ப பெற வலியுறுத்தி பல்வேறு கட்ட போராட்டங்கள் நடைபெற்று வருகிறது.

அதன் ஒரு பகுதியாக நாகை அவுரி திடலில் தமிழ்நாடு தவ்ஹித் ஜமாஅத் அமைப்பு சார்பாக சிறை நிரப்பும் போராட்டம் இன்று நடைபெற்றது.

அப்போது குடியுரிமை திருத்தச் சட்டத்தை திரும்ப பெற வலியுறுத்தியும், என்.பி.ஆர் உள்ளிட்ட சட்டங்களை ரத்து செய்ய வலியுறுத்தியும் கண்டன கோஷங்கள் எழுப்பப்பட்டது.

இஸ்லாமியர்களின் போராட்டம் காரணமாக பலத்த பாதுகாப்பு போடப்பட்டதுடன், தீயணைப்பு வாகனம் உள்ளிட்ட பாதுகாப்பு ஏற்பாடுகள் காவல்துறை சார்பாக செய்யப்பட்டு இருந்தது.

இந்தப் போராட்டத்தில் பெண்கள் உள்பட ஆயிரத்திற்கும் மேற்பட்டோர் கலந்துகொண்டு மத்திய அரசுக்கு எதிராக, கைகளில் பதாகைகளை ஏந்தியும், கண்டன கோஷங்களை எழுப்பியும் போராட்டத்தில் ஈடுபட்டனர்.

இதையும் படிங்க:தொழிற்பயிற்சி நிலையம் - மக்கள் தயார்; அரசு தயாரா?