அரிவாளுடன் ரகளையில் ஈடுபட்ட அதிமுக பிரமுகர்: வைரலாகும் காணொலி!

நாகப்பட்டினம்: செல்லூர் அருகே பொதுமக்கள் மத்தியில் அதிமுக ஒன்றியச் செயலாளர் அரிவாளுடன் ரகளையில் ஈடுபடும் காணொலி காட்சி வெளியாகி பரபரப்பை ஏற்படுத்தியுள்ளது.

நாகப்பட்டினம் மாவட்டம் செல்லூர் பகுதியில் தனியார் நிறுவனத்தால் கட்டப்பட்ட அங்கன்வாடி கட்டடம் உள்ளது. 2004ஆம் ஆண்டு வந்த சுனாமியின்போது சேதமடைந்த இந்தக் கட்டடம் சில தினங்களுக்கு முன் இடிக்கப்பட்டது.

இந்நிலையில் கட்டடம் இடிக்கப்பட்ட கல், மண்ணை அப்பகுதியைச் சேர்ந்த சிலர் வீட்டு வாசலில் கொட்டுவதற்கு அள்ளிச் சென்றதாக கூறப்படுகிறது.

இதனையறிந்த நாகை அதிமுக வடக்கு ஒன்றியச் செயலாளர் பன்னீர், குடிபோதையில் கையில் அரிவாளுடன் பொதுமக்களிடம் ரகளையில் ஈடுபட்டுள்ளார்.

மேலும், அதே பகுதியைச் சேர்ந்த பிரபாகர், அவரது உறவினர்களைத் தாக்கிய காட்சி தற்போது சமூக வலைதளங்களில் வைரலாகப் பரவிவருகிறது.

பொதுமக்கள் முன்னிலையில் குடிபோதையில் கையில் அரிவாளுடன் ரகளையில் ஈடுபட்ட பன்னீரின் மனைவி மகேஷ்வரி அந்தப் பகுதியின் ஊராட்சி மன்றத் தலைவி என்பது குறிப்பிடத்தக்கது.

இதையும் படிங்க: நீதிமன்றத்திற்குள் நுழைந்து கத்திய போதை நபரால் பரபரப்பு!