இறந்து பிறந்த குழந்தை: மண்ணில் குழிதோண்டி புதைத்த சிறுமி

மயிலாடுதுறை அருகே இளைஞருடன் பழகியதில் கர்ப்பமடைந்த 17 வயது சிறுமி இறந்த நிலையில் ஆண்குழந்தையைப் பிரசவித்தார். இதையடுத்து அக்குழந்தையைச் சிறுமி யாருக்கும் தெரியாமல் புதைத்தது இப்போது அம்பலமாகியுள்ளது.

மயிலாடுதுறை மாவட்டத்தில் உள்ள கிராமத்தில் நவம்பர் 2ஆம் தேதி ஒரு வீட்டின் பின்புறம் மண்ணில் புதைந்த நிலையில், இறந்து போன பச்சிளம் ஆண்குழந்தையின் சடலம் கண்டெடுக்கப்பட்டது.

இதுகுறித்து காவல்துறையினருக்குத் தகவல் கொடுக்கப்பட்டது. தகவலின் பேரில் சம்பவ இடத்திற்கு வந்த காவல்துறையினர் வழக்குப்பதிவு செய்து அப்பகுதியில் தீவிர விசாரணை நடத்தினர்.

விசாரணையில், அப்பகுதியைச் சேர்ந்த 17 வயது சிறுமிக்கு இறந்த நிலையில் ஆண் குழந்தை பிறந்ததும், அதனை அந்த சிறுமியே யாருக்கும் தெரியாமல் மண்ணில் புதைத்ததும் தெரியவந்தது.

சிறுமியிடம் விசாரணை

தொடர்ந்து அவரிடம் காவல் துறையினர் விசாரணை மேற்கொண்டனர். அதில், சிறுமி திருவாரூர் மாவட்டத்தில் உள்ள ஓர் கிராமத்தில் உறவினர் வீட்டில் தங்கியிருந்தபோது, அதே பகுதியைச் சேர்ந்த அபிமன்யு என்ற இளைஞருடன் அறிமுகம் ஏற்பட்டு பழகி வந்ததும், அவர் சிறுமியிடம் ஆசைக் வார்த்தைகூறி பாலியல் வன்புணர்வு செய்துள்ளார்.

இதில் சிறுமி கர்ப்பம் அடைந்து, இறந்த நிலையில் குழந்தையைப் பிரசவித்தது தெரியவந்தது.

இது தொடர்பாக சிறுமியின் பெற்றோர் மயிலாடுதுறை அனைத்து மகளிர் காவல்நிலையத்தில் புகார் அளித்தனர். புகாரின் அடிப்படையில் இளைஞர் அபிமன்யு மீது காவல் துறையினர் போக்சோ சட்டத்தின் கீழ் வழக்குப்பதிவு செய்து தலைமறைவாக உள்ள அபிமன்யுவைத் தேடி வருகின்றனர்.

பெற்றோர் அலட்சியம்

முன்னதாக சிறுமிக்கு கடந்த சில மாதங்களுக்கு முன்னர் கடுமையான வயிற்றுவலி ஏற்பட்டுள்ளது. இதையடுத்து, சிறுமியின் பெற்றோர் அவரை மருத்துவமனையில் காண்பித்தபோது, மருத்துவர் ஸ்கேன் எடுத்துவர பரிந்துரைத்துள்ளார்.

ஆனால், சிறுமியின் பெற்றோர் அதைப் பெரிதாக கண்டுக்கொள்ளவில்லை. இந்நிலையில், சிறுமிக்கு அண்மையில் குழந்தை இறந்து பிறந்ததும், அதனை அவர் யாருக்கும் தெரியாமல் மண்ணில் குழி தோண்டி புதைத்துள்ளார்.