திருப்பரங்குன்றம் கோயில் வாசலில் எளிமையான முறையில் நடைபெறும் திருமணங்கள்!

மதுரை: ஊரடங்கினால், சுப நிகழ்ச்சிகளில் குறைந்தளவே உறவினர்கள் கலந்துகொள்ளவேண்டும் என அரசு அறிவித்ததை தொடர்ந்து திருப்பரங்குன்றம் கோயில் வாசலில் எளிமையான முறையில் 30க்கும் மேற்பட்ட திருமணங்கள் இன்று நடைபெற்றன.

சில தளர்வுகளுடன் ஊரடங்கை மே 31ஆம் தேதி வரை நீட்டித்து மத்திய அரசு கடந்த சில நாள்களுக்கு முன்பு அறிவித்தது. இதைத் தொடர்ந்து திருமணங்கள், சுப நிகழ்ச்சிகள் போன்றவற்றில் குறைந்த அளவே மக்கள் கூடவேண்டும் என மாநில அரசு அறிவுறுத்தியது. இதனால், பல்வேறு திருமணங்கள் வேறு தேதிக்கு மாற்றியமைக்கப்பட்டன.

வழக்கமாக வைகாசி மாதங்களில் திருப்பரங்குன்றம் கோயிலில் 300க்கும் மேற்பட்ட திருமணங்கள் நடைபெறும். அதுவும் வைகாசி வளர்பிறை முகூர்த்தம் சிறப்பு வாய்ந்தது என்பதால் அந்த நாள்களில் அதிகளவில் திருமணங்கள் நடைபெறும். தற்போதைய ஊரடங்கால், கோயில் மூடப்பட்டிருப்பதால், கோயில் வாசலில் சில திருமணங்கள் ஆரவாரமின்றி நடைபெறுகின்றன.

இன்று 30க்கும் மேற்பட்ட திருமணங்கள் திருப்பரங்குன்றம் கோயில் வாசலில் நடைபெற்றன. முகக் கவசங்கள் அணிந்தும் தகுந்த இடைவெளியைப் பின்பற்றியும் மணமக்களை அவர்களது உறவினர்கள் வாழ்த்தினர்.

கோயில் வாசலில் தொடர்ந்து திருமணங்கள் நடைபெறுவதால், காவல் துறையினர் மக்களை கண்காணிக்கும் பணியில் ஈடுபட்டுள்ளனர். சமீபகாலமாக திருமணம் அனைத்தும் எளிமையான முறையில் நடைபெறுவதால், திருமண நிகழ்வுகளை நம்பி தொழில் செய்துவந்த புகைப்படக் கலைஞர்கள், நாதஸ்வர கலைஞர்கள், சமையல் கலைஞர்கள் என பல தரப்பினரும் வாழ்வாதரம் இழந்து தவித்து வருகின்றனர்.

விருதுநகர்

ஸ்ரீவில்லிபுத்தூர் பழனியாண்டவர் கோயில் வாசலில் வைத்து ஸ்ரீவில்லிபுத்தூரை சேர்ந்த பூபதி என்பவருக்கும் சிவகாசியைச் சேர்ந்த ஈஸ்வரி என்பவருக்கும் எளிமையான முறையில் திருமணம் நடைபெற்றது. இதில், மணமக்களின் உறவினர்கள் குறைந்த அளவில் கலந்துகொண்டு, தகுந்த இடைவெளியை பின்பற்றி மணமக்களை வாழ்த்தினர்.

இதையும் படிங்க:பிரியாணி சாப்பிட ஆசை...! கரோனா வைத்தது பூசை...!