நீர் நிலைகளே நாட்டிற்கு முக்கியம் - நீதிபதிகள் கருத்து!

மதுரை: நீர் நிலைகள் பாதுகாக்கப்பட வேண்டும், நிலத்தடி நீரை பாதுகாத்து, குடிநீர் தேவையை போக்கத்தான் முக்கியத்துவம் தர வேண்டும் என நீதிபதிகள் கருத்து தெரிவித்துள்ளனர்.

மதுரை மாநகராட்சி பகுதிகளில் மீன் வளர்ப்பு, குத்தகை விடுவது குறித்து முடிவெடுக்க குழு அமைத்து உயர் நீதிமன்ற மதுரை கிளை உத்தரவிட்டுள்ளது. மதுரை மாநகராட்சி பகுதியில் உள்ள நீர் நிலைகளில் மீன் வளர்ப்பு குத்தகை அனுமதிக்க கூடாது என்றும், இந்த நடவடிக்கைகளுக்கு தடை விதித்து உத்தரவிடக் கோரி பல மனுக்கள் உயர் நீதிமன்ற மதுரை கிளையில் தாக்கல் செய்யப்பட்டிருந்தன.

இந்த மனுக்களை நேற்று (பிப்.18) விசாரித்த நீதிபதிகள் எம்.எம்.சுந்தரேஷ், எஸ்.ஆனந்தி ஆகியோர், "நீர் நிலைகள் பாதுகாக்கப்பட வேண்டும். நிலத்தடி நீரை பாதுகாத்து, குடிநீர் தேவையைப் போக்கத்தான் முக்கியத்துவம் தர வேண்டும்.

நீர் நிலைகளே நாட்டிற்கு முக்கியம்

இனிவரும் காலங்களில் மாநகராட்சி பகுதியில் உள்ள நீர் நிலைகளில் மீன் வளர்ப்பு குத்தகை விடுவதற்கு முன்பாக வருவாய்த்துறை, பொதுப்பணித்துறை, மாநகராட்சி தரப்பு அலுவலர்கள் உள்ளிட்டோரைக் கொண்ட குழு அமைத்து, நீர் இருப்பு, நிலத்தடி நீர் மட்டம், எதிர்காலத் தேவை உள்ளிட்டவற்றை கருத்தில் கொண்டு ஆய்வு செய்ய வேண்டும். இவற்றின் அடிப்படையில் தான் மீன் வளர்ப்பு குத்தகை விட வேண்டுமா என்பது குறித்து முடிவெடுக்க வேண்டும் என உத்தரவிட்டு வழக்கை முடித்து வைத்தனர்.