வனவிலங்கு உடல் கடத்தல் வழக்கு: மத்திய சுற்றுச்சூழல் இயக்குநர் பதிலளிக்க உத்தரவு!

மதுரை: தமிழ்நாட்டிலுள்ள காடுகளில் விலங்குகளை கொன்று உடலை கடத்துவது குறித்து சிபிஐ அல்லது சிபிசிஐடி விசாரிக்க கோரிய வழக்கில் மத்திய சுற்றுச்சூழல், வனம் மற்றும் பருவநிலை துறை இயக்குநர் அறிக்கை தாக்கல் செய்ய உயர் நீதிமன்ற மதுரை கிளை உத்தரவிட்டுள்ளது.

திருச்சி மாவட்டத்தைச் சேர்ந்த நித்திய சௌமியா, உயர் நீதிமன்ற மதுரை கிளையில் மனு ஒன்றைத் தாக்கல் செய்திருந்தார். அந்த மனுவில், "தமிழ்நாட்டில் 3305 கிலோ மீட்டர் காடுகள் உள்ளது. இந்தக் காடுகளில் பல்வேறு அரிய உயிரினங்கள் வாழ்ந்து வருகிறது. தற்போது தமிழ்நாடு காடுகளில் வாழும் உயிரினங்கள் பல், தந்தம்,ஓடு போன்றவைகளுக்காக வேட்டையாடப்படுவது சமீப காலமாக அதிகரித்து வருகிறது.

உலகளவில், சட்ட விரோதமாக விலங்குகளின் பொருளுக்காக நடைபெறும் கடத்தல்கள் அதிகமாக இந்தியா வழியாகவே நடைபெறுகிறது. இதற்கு இந்தியாவில் சட்டங்கள் கடுமையாக இல்லாததே காரணம். இந்தியாவில் 2009 முதல் 2013 ஆம் ஆண்டு வரை 3 ஆயிரம் எறும்பு தின்னிகள் ஓடுகளுக்காக கொல்லப்பட்டுள்ளன. 25 கடத்தல்காரர்களிடம் இருந்து 5 ஆயிரம் கிலோ ஓடுகள் கைப்பற்றப்பட்டுள்ளது. எறும்பு தின்னிகள் பாதுகாக்கப்பட உயிரினங்களில் அட்டவணையில் இடம் பெற்றுள்ளது.

மருத்துவ பயன்பாட்டிற்காக ஏறும்பு திண்ணியின் ஓடுகள் அதிகப்படியாக சீனா போன்ற நாடுகளுக்கு கடத்தப்படுகிறது. காடுகளில் உள்ள அரிய வகை மரங்களானம் சந்தனம், தேக்கு போன்றவை சட்டவிரோதமாக கடத்தப்படுகிறது. காடுகளின் உள்ளே கஞ்சா செடிகள் வளர்த்து கடத்தப்படுவதும் சமீப காலமாக அதிகரித்து வருகிறது. குறிப்பாக 2021 ஜனவரி 5ஆம் தேதி 5.75 கிலோ எடையுள்ள எறும்பு தின்னி ஓடுகள், 6 சிறுத்தை நகங்கள், 6 கிலோ 2 யானையின் தந்தங்கள் ஆகியவை வனத்துறையினரால் கைப்பற்றப்பட்டுள்ளது.

அதேபோல், 2020 மே 20ஆம் தேதி கொடைக்கானல் காடுகளில் 1 கிலோ கஞ்சா வளர்க்கப்பட்ட நிலையில் வனத்துறையினர் கண்டுபிடித்து அளித்துள்ளனர். இதுகுறித்து உரிய விசாரணை மேற்கொள்ள வழக்கை சிபிஐ அல்லது சிபிசிஐடி விசாரிக்க உத்தரவிட வேண்டும்" என மனுவில் கூறியிருந்தார்.

இந்த மனு நீதிபதிகள் எம்.எம்.சுந்தரேஷ், ஆனந்தி அமர்வு முன்பு விசாரணைக்கு வந்தது. மனுதாரர் தரப்பில் ஏறும்பு தின்னி ஓடுகள், சிறுத்தை நகங்கள், யானை தந்தங்கள் ஆகியவை தமிழ்நாட்டில் கடத்தப்படுவதை தடுக்க உடனடியாக நடவடிக்கை வேண்டும் என கூறப்பட்டது

இதைத் தொடர்ந்து, நீதிபதிகள் வழக்கு குறித்த மத்திய சுற்றுச்சூழல் வனம் மற்றும் பருவநிலை துறை இயக்குநர், தமிழ்நாடு வனவிலங்கு குற்ற கட்டுப்பாட்டு பணியகத்தின் இயக்குநர் அறிக்கை தாக்கல் செய்ய உத்தரவிட்டு வழக்கு விசாரணையை மார்ச் 1 ஆம் தேதிக்கு ஒத்திவைத்து உத்தரவிட்டனர்.

இதையும் படிங்க:கோயில் யானை தாக்கி பேச்சு இழந்த பெண்: 20 ஆண்டுகளுக்குப் பின் கிடைத்தத் தீர்ப்பு!