மதுரை அருகே மூன்று ஐம்பொன் சிலைகள் திருட்டு!

மதுரை : சிவன் கோயில் பூட்டை உடைத்து அடையாளம் தெரியாத நபர்கள் மூன்று ஐம்பொன் சிலைகள் திருடிச் சென்ற சம்பவம், அப்பகுதியில் பெரும் பரபரப்பை ஏற்படுத்தியுள்ளது.

மதுரை மாவட்டம், வாடிப்பட்டி அருகே உள்ளது குட்லாடம்பட்டி . இங்குள்ள அண்ணாமலையார் கோயிலில் நள்ளிரவில் புகுந்த அடையாளம் தெரியாத நபர்கள் கோயிலின் பூட்டை உடைத்து அங்கிருந்த பழமை வாய்ந்த நடராஜர், சிவகாமி, மாணிக்கவாசகர் உள்ளிட்ட மூன்று ஐம்பொன் சிலைகளை திருடிச் சென்றுள்ள சம்பவம் பெரும் பரபரப்பை ஏற்படுத்தியுள்ளது.

இவை மூன்றும் சுமார் 80 ஆயிரம் ரூபாய் மதிப்பு வாய்ந்ததாக கருதப்படுகிறது. அண்ணாமலையார் கோயிலில் இன்று காலை வழக்கம்போல் பூசாரி திருவேங்கடம் என்பவர் கோயிலைத் திறந்து பார்த்தபோது, கோயிலில் சிலைகள் காணாமல் போனதைக் கண்டு அதிர்ச்சியடைந்தார். பின்னர், உடனடியாக இதுகுறித்து வாடிப்பட்டி காவல் துறைக்குத் தகவல் தெரிவித்தார்.

இதையடுத்து,சம்பவ இடத்திற்கு விரைந்து சென்ற சிலைத் திருட்டு தடுப்புப் பிரிவு ஏடிஎஸ்பி மலைச்சாமி தலைமையிலான காவல் துறையினர் விசாரணை நடத்தினர். மேலும் கோயிலில் அமைந்துள்ள சிசிடிவி கேமரா காட்சிகளைக் கைப்பற்றி, அதில் பதிவான காட்சிகளின் அடிப்படையில் சிலை திருடிச் சென்ற குற்றவாளிகளைத் தேடி வருகின்றனர்.

இதையும் படிங்க: 44 கோடி கரோனா தடுப்பூசிகள் வாங்க ஆர்டர்: ஒன்றிய அரசு உத்தரவு