இந்திய தொழில் கூட்டமைப்பு மற்றும் டெக்ஸ்வேலி இணைந்து நடத்தும் வீவ்ஸ் 2019 ஜவுளி கண்காட்சி நவம்பர் 27ஆம் தேதி தொடங்கி 30ஆம் தேதி வரை ஈரோட்டில் நடைபெறுகிறது. இந்தக் கண்காட்சி குறித்து மதுரையில் டெக்ஸ்வேலி நிர்வாகிகள் செய்தியாளர்களைச் சந்தித்து பேசினர்.
இந்திய தொழில் கூட்டமைப்பு மதுரை தலைவர் நாகராஜ் கிருஷ்ணன் கூறுகையில், 'ஜவுளி தொழில்களை மேம்படுத்துவதற்காக நடத்தப்படும் இந்த கண்காட்சியில் சர்வதேச நிறுவனங்களும் பங்கேற்கின்றன. பெரிய அளவிலான நிறுவனங்கள் மட்டுமின்றி சிறுதொழில் நிறுவனங்களும் கலந்து கொள்கின்றன.
இந்திய பொருளாதாரத்தில் முக்கியப் பங்கு வகிப்பது ஜவுளித்துறை தான். இந்தியாவில் அதிக அளவிற்கான வேலைவாய்ப்புகள் ஜவுளித்துறை மூலமாகத்தான் வழங்கப்படுகிறது. இது அனைவரையும் கவரும் வகையில் பொருளாதார வளர்ச்சிக்கான கண்காட்சியாக அமையும்' என்றார்.
இதனைத்தொடர்ந்து பேசிய டெக்ஸ்வேலி துணைத் தலைவர் தேவராஜன், 'மதுரையை மையமாக வைத்து 2 ஆயிரம் கோடி அளவிற்கு ஜவுளி பொருளாதாரம் ஈர்க்கப்பட்டு வருகிறது. இந்தியாவில் உள்ள அனைத்து ஜவுளித்துறை தொடர்பான தொழில் முனைவோர்கள் இதில் கலந்து கொள்கின்றனர்' என்று தெரிவித்தார்.