இலவச தடுப்பூசிக்கு விளம்பரம் தேடும் பிரதமர் மோடி- சு. வெங்கடேசன் எம்பி கண்டனம்

அனைவருக்கும் தடுப்பூசி இலவசமாய் கொடுத்ததற்காக மோடிக்கு நன்றி சொல்லி அஞ்சலகங்களில் போஸ்டர் ஒட்ட அலுவலர்களுக்கு சுற்றறிக்கை கொடுக்கப்பட்டுள்ளது எதற்காக என மதுரை மக்களவை உறுப்பினர் சு. வெங்கடேசன் ட்விட்டரில் கேள்வி எழுப்பியுள்ளார்.

மதுரை:இது தொடர்பாக ட்வீட் செய்துள்ள அவர், "மூன்று விலைகள் வைத்து மாநிலங்களை அல்லாட விட்டதற்கா? ஒன்றிய அரசு ஒன்று இருக்கும் போது ஒவ்வொரு நாடாய் மாநில அரசுகளை தடுப்பூசி கிடைக்குமா என்று அலைய விட்டதற்காகவா? கடும் எதிர்ப்பு வந்த பிறகு தடுப்பூசி கொள்கையை திரும்பப் பெற்று அப்போதும் கூட 25 விழுக்காட்டை தனியாருக்கு ஒதுக்கிய கார்ப்பரேட் பாசத்திற்காகவா?

இந்தியாவில் உற்பத்தியான தடுப்பூசிகளை வெளி நாட்டிற்கு அனுப்பி விட்டு இங்கே இந்திய மக்களை தடுப்பூசி கிடைக்காமல் அலை மோத விட்டதற்கா? தடுப்பூசி பற்றாக்குறை வந்தவுடன் எவ்வளவு தடுப்பூசி இருக்கிறது என்பதை கூட மக்களுக்கு சொல்லக் கூடாது என மாநில அரசுகளுக்கு வாய்ப்பூட்டு போட்டதற்கா?

போஸ்டர்

உலகில் தடுப்பூசி போட்டவர்கள் விகிதத்தில் 10ஆவது இடத்துக்கும் கீழே இந்தியா இருப்பதற்காக, இப்படி எத்தனையோ காரணங்களுக்காக மக்கள் ஒன்றிய அரசை கடுமையாக வசையாடிக் கொண்டிருக்கும்போது அரசாங்க செலவில், அரசு அலுவலகத்தின் முன்னாள் அரசு அலுவலரே சுவரொட்டி ஒட்ட வேண்டுமாம் எனக் குறிப்பிட்டுள்ளார்.

மேலும், அந்த சுற்றறிக்கையில் ஒரு வாக்கியம் விடுபட்டு போயுள்ளதாகவும், மூன்றாவது அலை வருவதற்குள் இந்த போஸ்டரை ஒட்ட வேண்டும் என்ற வாக்கியத்தை அடுத்த சுற்றிக்கையில் சேர்த்துக்கொள்ளவும் எனவும் நக்கலடித்துள்ளார்.

இதையும் படிங்க:'ரீபவரிங்' குறித்து ஆளுநர் உரையில் தெரிவிக்கப்பட்டிருப்பது மகிழ்ச்சி - பூவுலகின் நண்பர்கள்