தென் மாவட்டங்களில் அதிகரிக்கும் எஸ்சி, எஸ்டி வழக்குகள்? முதலிடத்தைப் பெற்ற மதுரை.. ஆர்டிஐயில் வெளியான அதிர்ச்சி தகவல்!

Right to information act: இரண்டு ஆண்டுகளில் 210 எஸ்.சி, எஸ்.டி வழக்குகள் பதிவாகி தமிழகத்தில் மதுரை மாவட்டம் முதலிடத்தில் இருப்பதாக ஆர்டிஐ மூலம் வெளியான தகவல் மூலம் தெரிய வந்துள்ளது.

மதுரை:மதுரையைச் சேர்ந்த வழக்கறிஞர் சந்தானம் என்பவர், தகவல் அறியும் உரிமைச் சட்டத்தின் வாயிலாக கடந்த 2021 மற்றும் 2023 மே மாதம் வரை பதிவான எஸ்.சி, எஸ்.டி வன்கொடுமை வழக்குகள் குறித்து கேள்வி எழுப்பியிருந்தார். இதற்கு வழக்குகளின் எண்ணிக்கை விவரங்கள், வழக்கின் தன்மை ஆகியவை கொண்டு விளக்கம் அளிக்கப்பட்டது.

அந்தப் பதிலில், “பட்டியல் சாதி மற்றும் பட்டியல் பழங்குடியினர் சாதிய ரீதியாக இழிவாக பேசப்படுவது, தாக்குதல்களுக்கு உள்ளாக்கப்படுவது, படுகொலைகள், பாலியல் வன்புணர்ச்சி என பாதிக்கப்படும்போது, சட்டரீதியாக அவர்களுக்குத் தீர்வு ஏற்படுத்தி மறுவாழ்வு கிடைக்கப் பெற செய்ய வேண்டும் என்பதற்காக பட்டியல் சாதியினர் மற்றும் பட்டியல் பழங்குடியினர் வன்கொடுமை தடுப்புத் திருத்தச் சட்டம் 2015 (எஸ்.சி/ எஸ்.டி திருத்தச் சட்டம்) கொண்டு வரப்பட்டது.

இந்த திருத்தச் சட்டத்தின் அடிப்படையில், கடந்த 2021 மற்றும் 2023 மே மாதம் வரை மட்டும் மதுரை, விருதுநகர், திண்டுக்கல், ராமநாதபுரம் ஆகிய 4 மாவட்டங்களில் மொத்தம் 576 வழக்குகள் பதிவாகியுள்ளன. இதில் மதுரை மாவட்டத்தில்தான் அதிகளவாக 210 வழக்குகள் பதிவாகி உள்ளது.

வழக்கறிஞர் சந்தானம்

இதில் 8 கொலை வழக்குகளும், 3 போக்சோ மற்றும் ஒரு கொத்தடிமை தொழிலாளர் முறை வழக்கும் பதிவாகி உள்ளது. கொலை வழக்கில் மத்திய, மாநில அரசுகளின் நிவாரணத் தொகை, குடும்பத்தில் ஒருவருக்கு வேலை, மாத ஓய்வூதியம், நிலம் வழங்குதல் போன்ற மறுவாழ்வு நிவாரணங்கள் முழுமையாக கிடைக்கப் பெறாத சூழல் உள்ளது.

நான்கு மாவட்டங்களில் இராமநாதபுரம் 133 வழக்குகளுடன் இரண்டாவது இடத்திலும், திண்டுக்கல் மாவட்டம் 126 வழக்குகளுடன் 3-ஆவது இடத்திலும், விருதுநகர் மாவட்டம் 107 வழக்குகளுடன் 4வது இடத்திலும் உள்ளன. இந்த நான்கு மாவட்டங்களில் பதிவான 576 வழக்குகளில் 47 வழக்குகள் உண்மைக்குப் புறம்பானது (Mistake of Fake) என அவை ரத்து செய்யப்பட்டுள்ளன” என தெரிவிக்கப்பட்டது.

இந்நிலையில், தமிழ்நாடு காவல்துறையின் ADGP சமூக நீதி மற்றும் மனித உரிமைகள் பிரிவு அறிக்கையின்படி தமிழகத்தில், குறிப்பாக மதுரையில் சாதியத் தீண்டாமை வன்கொடுமைகள் அதிகம் நடைபெறும் மாவட்டங்களில், மதுரை மாவட்டத்தில் 43 கிராமங்கள் அடையாளப்படுத்தப்பட்டு, மாநிலத்திலேயே முதல் இடத்தில் உள்ளது என்று குறிப்பிடப்பட்டுள்ளது.

ஆனால், பொதுமக்களிடையே சாதிய மனோபாவத்தைப் போக்கி மதுரை மாவட்டத்தில் காவல்துறை நல்லிணக்கத்தை உருவாக்க வேண்டிய விழிப்புணர்வு கூட்டங்கள் அதிக அளவில் நடத்தப்படுவதில்லை என்ற குற்றச்சாட்டும் எழுத்துள்ளது. ஆகையால் இதுபோன்ற நல்லிணக்கக் கூட்டங்கள் அனைத்துப் பகுதிகளிலும் நடைபெற வேண்டும் என வழக்கறிஞர் சந்தானம் தமிழக அரசுக்கு வேண்டுகோள் விடுத்துள்ளார்.

இதையும் படிங்க:மோசமடையும் உடல்நிலை.. அமைச்சர் செந்தில் பாலாஜிக்கு என்ன ஆச்சு? மருத்துவக்குழு வெளியிட்ட தகவல்!