பாம்பன் பாலத்தில் பராமரிப்பு பணிகள்: மண்டபத்திலிருந்து ரயில்கள் புறப்படும்

ராமேஸ்வரம் பாம்பன் பாலத்தில் தற்போது பராமரிப்பு பணிகள் நடைபெறுகின்ற காரணத்தால், மண்டபம் ரயில் நிலையத்தில் இருந்து ரயில்கள் அனைத்தும் புறப்படும் என மதுரை கோட்டம் தெரிவித்துள்ளது.

மதுரை:இதுகுறித்து தெற்கு ரயில்வேயின் மதுரை கோட்டம் வெளியிட்டுள்ள செய்திக்குறிப்பில், "பாம்பன் பாலத்தில் பராமரிப்பு பணிகள் நடைபெறுவதால் வண்டி எண் 06852 ராமேஸ்வரம்- சென்னை எழும்பூர் சிறப்பு ரயில் இன்று ராமேஸ்வரம்- மண்டபம் ரயில் நிலையங்களுக்கு இடையே பகுதியாக ரத்து செய்யப்பட்டு மண்டபம் ரயில் நிலையத்தில் இருந்து மாலை 5.40 மணிக்கு புறப்படும்.

மேலும், வண்டி எண் 02206 ராமேஸ்வரம்- சென்னை எழும்பூர் சிறப்பு ரயிலும் இன்று ராமேஸ்வரம் மண்டபம் ரயில் நிலையங்களுக்கு இடையே பகுதியாக ரத்து செய்யப்பட்டு மண்டபம் ரயில் நிலையத்திலிருந்து இரவு 10.30 மணிக்கு புறப்படும்.

இந்த இரு ரயில்களுக்கும் ராமேஸ்வரத்திலிருந்து பயணச்சீட்டு பதிவு செய்த பயணிகள் சிறப்பு பேருந்துகள் மூலம் மண்டபம் ரயில் நிலையத்திற்கு அழைத்து வர ஏற்பாடுகள் செய்யப்பட்டுள்ளன" எனத் தெரிவிக்கப்பட்டுள்ளது.

இதையும் படிங்க:பாம்பன் பாலத்தை கடந்து சென்ற மத்திய அரசின் கப்பல்கள்