தமிழ்நாடு சிறையிலுள்ள காலிப் பணியிடங்களை நிரப்பக் கோரிய வழக்கிற்குப் பதிலளிக்க உத்தரவு!

மதுரை: தமிழ்நாட்டிலுள்ள சிறையில் காலியாக இருக்கும் அலுவலர்கள் பணியிடங்களை நிரப்ப உத்தரவிடக் கோரிய வழக்கில் உள் துறை கூடுதல் தலைமைச் செயலர், சிறைத் துறை டிஜிபி ஆகியோர் பதிலளிக்க சென்னை உயர் நீதிமன்றம் மதுரைக் கிளை உத்தரவிட்டது.

தமிழ்நாட்டிலுள்ள சிறையில், காலியாக இருக்கும் கூடுதல் கண்காணிப்பாளர் மற்றும் சமூகநல ஆர்வலர்கள் பணியிடங்களை நிரப்ப உத்தரவிடக் கோரி, உயர் நீதிமன்றம் மதுரை கிளையில், மதுரை சின்னசொக்கிகுளத்தைச் சேர்ந்த ராஜா என்பவர் மனு தாக்கல்செய்துள்ளார்.

அம்மனுவில் கூறியிருப்பதாவது, “தமிழ்நாடு சிறைகளில், 2018 முதல் 24 கூடுதல் கண்காணிப்பாளர் பணியிடங்கல் காலியாக உள்ளன. இப்பணி மிகவும் முக்கியமானது. சிறையில் கைதிகளை அனுமதிப்பது, விடுவிப்பது, வாரண்ட் தொடர்பான அனைத்துவித ஆவணங்களையும் சரிபார்க்க வேண்டியதும் இவர்களது பணி. ஜெயிலராகப் பணியாற்றுவோர் பதவி உயர்வின் மூலம் நியமிக்கப்படுவர்.

இதேபோல் சிறைகளிலும், கூர்நோக்கு இல்லங்களிலும் சமூகநல அலுவலர் பணியிடமும் காலியாக உள்ளது. இதனால், மற்றப் பணிகளில் உள்ளவர்கள் கூடுதல் பணியைச் செய்ய வேண்டியுள்ளதால், வழக்கமான பணிகள் பாதிக்கின்றன.

மதுரை மத்திய சிறையில் கடந்தாண்டு இரு மாதங்களில் ஐந்து பேர் தற்கொலை செய்துள்ளனர். உளவியல் ரீதியாக மனோதத்துவப் பயிற்சி அளிக்க முடியவில்லை. இதனால்தான் தற்கொலை சம்பவங்கள் நடக்கின்றன.

எனவே, இவற்றைத் தடுக்க சிறைகளில் காலியாகவுள்ள கூடுதல் கண்காணிப்பாளர், சமூக சேவகர் பணியிடங்களை நிரப்ப வேண்டுமென உத்தரவிட வேண்டும்” எனக் கூறியிருந்தார்.

இம்மனுவை நேற்று (மார்ச் 26) விசாரித்த நீதிபதிகள் எம்.எம். சுந்தரேஷ், எஸ். ஆனந்தி ஆகியோர் மனுவிற்கு உள் துறை கூடுதல் தலைமைச் செயலர், சிறைத் துறை டிஜிபி ஆகியோர் பதிலளிக்க உத்தரவிட்டு, விசாரணையை ஏப்ரல் 23ஆம் தேதிக்குத் தள்ளிவைத்தனர்.

இதையும் படிங்க: தர்மபுரியில் அமைச்சரின் சம்பந்திக்குச் சொந்தமான கல்வி நிறுவனங்களில் சோதனை!