கடந்த மாதம் டெல்லியில் நடைபெற்ற சமய மாநாட்டில் கலந்துகொண்ட மதுரை திருமங்கலத்தில் உள்ள ரோஜாதோட்டம் பகுதியைச் சேர்ந்த ஒருவருக்கு கரோனா தொற்று உறுதியானது.
இதைத்தொடர்ந்து திருமங்கலம் நகராட்சிக்குள்பட்ட 13, 14, 15 ஆகிய மூன்று வார்டுகளையும் மூடி சீல்வைக்க மதுரை மாவட்ட ஆட்சியர் உத்தரவிட்டதன்படி அனைத்து பாதைகளிலும் நகராட்சி ஊழியர்கள் தடுப்புகள் அமைத்தனர்.
தொடர்ந்து அப்பகுதியில் அவருடன் தொடர்பில் இருந்தவர்கள் குறித்து சுகாதாரப் பணியாளர்கள் ஆய்வு மேற்கொண்டனர். மேலும் அப்பகுதி மக்கள் எக்காரணம் கொண்டும் வெளியில் வரவும், வெளியாள்கள் உள்ளே செல்லவும் அனுமதி மறுக்கப்பட்டுள்ளது.
அப்பகுதி மக்களுக்குத் தேவையான அத்தியாவசியப் பொருள்களை வீடுகளுக்கு நேரடியாகச் சென்று வழங்குவதற்கும் நகராட்சி சார்பில் ஏற்பாடு செய்யப்பட்டுள்ளது. தொடர்ந்து அப்பகுதி முழுவதும் குளோரின் தூள் தூவப்பட்டு முழுக்கட்டுப்பாட்டில் கொண்டுவரப்பட்டுள்ளது.