ஈடிவி பாரத் செய்திகளுக்காக ராஜன் அளித்த பிரத்யேக பேட்டியில் கூறியதாவது:
மக்களுக்குத் தடையின்றி தண்ணீர் விநியோகம் செய்வதற்காக, தமிழ்நாட்டில் 1971ஆம் தமிழ்நாடு குடிநீர் வடிகால் வாரியம் தொடங்கப்பட்டது. 540-க்கும் மேற்பட்ட கூட்டுக் குடிநீர்த் திட்டங்களின் மூலமாக 4 கோடிக்கும் மேற்பட்ட மக்களின் தண்ணீர் தேவையை பூர்த்தி செய்து வருகிறது. தினமும் 1800 மில்லியன் கேன் லிட்டர் தண்ணீர் விநியோகிக்கப்படுகிறது. தற்போது நிதி பற்றாக்குறையை காரணம்காட்டி தமிழ்நாடு குடிநீர் வடிகால் வாரியத்தை மூடுவதற்கு அரசு முயற்சித்து வருகிறது. இது வன்மையாக கண்டிக்கத்தக்கது.
இந்த வாரியத்தில் 4 ஆயிரம் காலியிடங்கள் இருக்கின்றன. இதன் பல்வேறு பிரிவுகளில் சராசரியாக 60 சதவிகிதப் பணியிடங்கள் காலியாக உள்ளது. இதனால் கூட்டுக்குடிநீர்த் திட்டப்பணிகள் கடுமையாகப் பாதிக்கப்பட்டுள்ளன. மக்களுக்கு குடிநீர் தொய்வின்றி வழங்க வேண்டுமெனில், இந்த வாரியத்தை வலுப்படுத்த வேண்டும். ஆரம்பத்தில் சென்டேஜ் என்று சொல்லப்படுகின்ற திட்டப்பணிகளில் குறிப்பிட்ட விழுக்காட்டை ஊழியர்களின் ஊதியம், அலுவலகப் பணிகளுக்கு எடுத்துக் கொள்வதன் மூலமாக நிறுவன செலவு ஈடுகட்டப்பட்டு வந்தது. தொடக்கத்தில் 15 சதவிகிதமாக இருந்த சென்டேஜ் தற்போது 5 சதவிகிதமாக குறைத்ததே வாரியத்தின் வீழ்ச்சிக்கு முக்கியக் காரணம்.
இந்த வாரியத்தில் ஓய்வுபெற்ற ஊழியர்களுக்கு ரூ.400 கோடி வரை ஓய்வூதியம் நிலுவையில் உள்ளது. வாரியத்தை காப்பாற்ற தமிழக அரசு தனது பட்ஜெட்டில் ஆண்டுக்கு ரூ.2 ஆயிரம் கோடி ஒதுக்கீடு செய்ய வேண்டும். தற்போது பணியிலுள்ள பெரும்பாலானோர் கடுமையான பணிச் சுமையினாலும், மன உளைச்சலினாலும் பாதிக்கப்பட்டுள்ளனர். இதன் காரணமாக குடிநீர்த் திட்டங்கள் பாதிப்படைய வாய்ப்புள்ளது.
கடந்த 1971-லிருந்து 2002 வரை ஏறக்குறைய 31 ஆண்டுகள் வெறும் ஒரு பைசாவுக்கு கிராமப்புற மக்களுக்கு 3 லிட்டர் தண்ணீரும் நகர்ப்புற மக்களுக்கு 4 லிட்டர் தண்ணீரும் வழங்கியது. கடந்த 2002-லிருந்து 2018-ஆம் ஆண்டு வரை அதே ஒரு பைசாவுக்கு கிராமப்புறங்களுக்கு 3 லிட்டரும், நகர்ப்புறங்களுக்கு 2 லிட்டரும் வழங்கி வருகிறது. கடந்த 2018-லிருந்து ஆயிரம் லிட்டர் தண்ணீர் கிராமப்புறங்களுக்கு ரூ.7-ம், நகர்ப்புறங்களுக்கு ரூ.9-ம் கட்டணமாக நிர்ணயிக்கப்பட்டு வழங்கப்படுகிறது. ஆனால் இதே காலகட்டத்தில் தமிழக அரசு அம்மா குடிநீர் என்று 1 லிட்டர் தண்ணீரை ரூ.10-க்கு விற்பனை செய்கிறது. இதே அளவு தண்ணீரை மத்திய அரசு ரயில்வே நிலையங்கள் ரூ.15-க்கும், தனியார் நிறுவனங்கள் ரூ.20-லிருந்து ரூ.22 வரை விற்பனை செய்து வருகின்றன.
நியாயமாக தமிழ்நாடு குடிநீர் வாரியத்திற்கு கிடைக்க வேண்டிய லாபம் எல்லாம் தனியார் நிறுவனங்களின் தண்ணீர் வேட்டைக்குச் சென்றுவிட்டால், எப்படி நிறுவனம் லாபமீட்ட முடியும்? ஆட்சியாளர்கள் திட்டமிட்டு இந்த பொதுத்துறை நிறுவனத்தை முடக்கி வருகிறார்கள். தற்போது வாரியம் சந்தித்து வரும் நிதிச்சுமையை அரசு ஏற்றுக்கொண்டால் தமிழகம் முழுவதும் தண்ணீரை இலவசமாகவே வழங்க முடியும். அந்த அளவிற்கு அடிப்படைக் கட்டமைப்பு வசதிகளையும், மனித உழைப்பையும் கொண்டுள்ளது.
தற்போதுள்ள சூழலில் மிக நியாயமான விலையை நிர்ணயித்து பொதுமக்களுக்கு தண்ணீர் வழங்கும் பொறுப்பை வாரியத்திற்கு வழங்கினால், அதில் பணியாற்றும் ஊழியர்கள் பாதுகாக்கப்படுவதுடன், தமிழக அரசுக்கும் நல்ல வருமானம் கிடைக்க வாய்ப்புண்டு. இதனை உடனடியாக தமிழக அரசு செய்ய வேண்டும் என்பதே ஊழியர்களின் வேண்டுகோள், என்றார்.
