தமிழ்நாடு

tamil nadu

By

Published : Dec 8, 2022, 12:16 PM IST

ETV Bharat / state

மூத்த குடிமக்களுக்கு ரயில் கட்டண சலுகை மறுப்பு: சு.வெங்கடேசன் எம்.பி கண்டனம்

மூத்த குடிமக்களுக்கான ரயில் பயணச் சலுகையை மறுப்பது, அவர்களுக்கு மேலும் உளவியல் சிக்கல்களுக்குள் தள்ளுவதற்கே வழிவகுக்கும் என சு.வெங்கடேசன் எம்.பி தெரிவித்துள்ளார்.

சு.வெங்கடேசன் எம்.பி.
சு.வெங்கடேசன் எம்.பி.

மதுரை: மூத்த குடிமக்களுக்கான ரயில் பயணச் சலுகை மறுப்பது மூத்த குடிமக்களை மேலும் உளவியல் சிக்கல்களுக்குள் தள்ளுவதற்கே வழிவகுக்கும். 14 கோடியே 43 லட்சம் மூத்த குடிமக்கள் நமது நாட்டில் உள்ளனர். இவர்களின் நலனை புறக்கணிக்கும் வகையில் ரயில்வேயின் இந்த முடிவு கடுமையான கண்டனத்திற்குரியது என மதுரை நாடாளுமன்ற உறுப்பினர் சு. வெங்கடேசன் தெரிவித்துள்ளார். இது குறித்து அவர், இன்று (டிச.8) வெளியிட்டுள்ள அறிக்கையில், நடப்பு நாடாளுமன்ற கூட்டத்தொடரில் மூத்த குடிமக்களுக்கான பயணச்சலுகை வழங்கப்படுமா என்று எழுப்பிய கேள்விக்கு (எண் 230/ 07.11.2022) ரயில்வே அமைச்சர் அஸ்வினி வைஷ்ணவ் கை விரித்துள்ளார் என கூறியுள்ளார்.

மூத்த குடிமக்களுக்கான ரயில் கட்டண சலுகையை வழங்க கோரி நாடாளுமன்ற நிலைக்குழு பரிந்துரை அளித்துள்ளதா? எதற்காக அச்சலுகை வழங்கப்படவில்லை? என்று கேள்வி எழுப்பியிருந்தேன். இதற்கு டிசம்பர் 7ஆம் தேதி ரயில்வே அமைச்சர் பதில் அளித்துள்ளார். அந்த பதிலில் 2019-20 ஆம் ஆண்டில் மானியங்களுக்காக ரூ.59 ஆயிரத்து 837 கோடி செல்விடப்பட்டுள்ளது. அனைத்து பயணிகளுக்கும் 53 சதவீதம் தான் கட்டணம் சராசரியாக வசூலிக்கப்படுகிறது, 47 சதவீதம் மானியம் அளிக்கப்படுகிறது என்றும் மாணவர்கள் மாற்றுத்திறனாளிகள் நோயாளிகளுக்கு சலுகை அளிக்கப்படுகிறது என்றும் பதில் அளித்துள்ளார்.

இப்படி மூத்த குடிமக்களுக்கு கட்டண சலுகை மறுக்கப்படுவதால் அவர்கள் பயணம் செய்வதைத் தவிர்க்கிற நிலைமை எழாதா? அவர்களின் சேமிப்புகள் கரையாதா? என்ற கேள்விக்கு ரயில்வே நிறைய வகையிலான ரயில்களை - அதாவது துரந்தோ, வந்தே பாரத், தேஜஸ், காட்டிமேன், ஹம்சபார், எக்ஸ்பிரஸ், மெயில், பாசஞ்சர் என - இயக்குகின்றன. அவற்றில் வெவ்வேறு வகுப்பு பயணங்களும் - முதல், இரண்டாம், சாதாரண வகுப்பு - உள்ளன. ஆகவே மூத்த குடிமக்கள் அவரவர் விரும்புகிற வகையில் பயணம் செய்து கொள்ளலாம் என்றும் பதில் தெரிவித்துள்ளார்.

இவர்கள் சொல்கிற மானிய கணக்கு பழையதுதான்; அப்போதும் மூதத குடிமக்கள் கட்டண சலுகை வழங்கப்பட்டு வந்தது; ஆகவே மானியத்தை காரணம் காண்பிப்பது 'ஏமாற்றுகிற வேலை. நீங்கள் தந்து வரும் கார்ப்பரேட் சலுகைகளும், வரிக் குறைப்புகளும் இதை விடப் பல மடங்கு இல்லையா? என கேள்வி எழுப்பியுள்ளார்.

நாடாளுமன்ற நிலைக்குழு, பயணிகள் வருமானம் அதிகரிக்க தொடங்கி இருப்பதால் மூத்த குடிமக்கள் பயணச் சலுகையை உடனடியாக வழங்க வேண்டும் என்று பரிந்துரை செய்தது. இந்த ஆண்டு ஏப்ரல் முதல் நவம்பர் வரை பயணிகள் வருமானம் 43 ஆயிரத்து 300 கோடியாக உயர்ந்துள்ளது. இதே காலத்தில் சென்ற ஆண்டு 24 ஆயிரத்து 600 கோடி தான் வருமானம் வந்தது என்றும் ரயில்வே அமைச்சகம் முன்பே செய்தி வெளியிட்டு இருந்தது என தெரிவித்துள்ளார்.

அந்த அடிப்படையில் பார்த்தால் பயணிகள் வருமானம் சென்றாண்டை விடவும் 2019 - 20ஐ விடவும் கூடுதலாக 50,000 கோடியை எட்டும் என்று எதிர்பார்க்கலாம். இந்த நிலையில் நாடாளுமன்ற நிலைக் குழுவின் பரிந்துரையையும் புறந்தள்ளி மூத்த குடிமக்களுக்கான பயண சலுகையை மறுப்பது எந்த விதத்திலும் நியாயம் இல்லை, முத்த குடிமக்கள் மருத்துவத்திற்காகவும் சுற்றுலாவுக்காகவும் செல்லும் பயணத்திற்கு பயண சலுகை மறுப்பது ஈவிரக்கமற்ற செயல் ஆகும் என கண்டனம் தெரிவித்துள்ளார்.

இதை விட ரயில்களின் பலவகை, பயண வகுப்புகளின் பல வகைகளை சொல்லி அவற்றில் அவரவர் தெரிவு செய்து கொள்ளட்டும் என்று கூறி இருப்பது குரூரமானது. ஒரு நாகரிக சமூகத்தின் பண்புகளில் ஒன்று மூத்த குடிமக்களின் நலன் பேணுவது என்பதை அரசு புரிந்து கொள்ள வேண்டும். கோரிக்கை வைத்தால் எள்ளி நகையாடுவது அழகல்ல என கூறியுள்ளார்.

மூத்த குடிமக்கள் எந்த விதமான வருமானமும் இன்றி 78 சதவிகிதம் பேர் தங்கள் குழந்தைகளை நம்பி உள்ளார்கள் என்று தேசிய மாதிரி ஆய்வு கூறுகிறது. குழந்தைகளோ வேலையில்லா திண்டாட்டத்தாலும், வருமானம் குறைவான வேலையாலும், விலைவாசி உயர்வாலும் பாதிக்கப்பட்டுள்ளனர். இந்த நிலையில் மூத்த குடிமக்களுக்கான இந்த பயணச் சலுகை மறுப்பது மூத்த குடிமக்களை மேலும் உளவியல் சிக்கல்களுக்குள் தள்ளுவதற்கே வழிவகுக்கும். 14 கோடியே 43 லட்சம் மூத்த குடிமக்கள் நமது நாட்டில் உள்ளனர். இவர்களின் நலனை புறக்கணிக்கும் வகையில் ரயில்வேயின் இந்த முடிவு கடுமையான கண்டனத்திற்குரியது எனவும் அவர் கூறியுள்ளார்.

இதையும் படிங்க:'அண்ணாமலை திமுகவை குறை சொல்வது அவசியம் இல்லை' கே.எஸ்.அழகிரி

ABOUT THE AUTHOR

...view details