மு.க.அழகிரி மௌனம் கலைத்தால் திமுகவில் பூகம்பம்தான் - அமைச்சர் ஆர்.பி. உதயகுமார்

மதுரை: தற்போது மௌனத்தில் இருக்கும் மு.க.அழகிரி தனது மௌனத்தை கலைத்தார் என்றால் திமுகவில் மிகப் பெரிய பூகம்பம் வெடிக்கும் என்று அமைச்சர் ஆர் பி உதயகுமார் கூறியுள்ளார்.

கரோனா வைரஸ் தொற்றால் பாதிக்கப்பட்டவர்களுக்கு அம்மா அறக்கட்டளை சார்பில் உணவு வழங்கப்பட்டுவருகிறது அதன் ஐம்பதாவது நாளான இன்று, அமைச்சர் ஆர் பி உதயகுமார் பணிகளை பார்வையிட்டார்.

பிறகு செய்தியாளர்களிடம் பேசிய அவர், “தமிழ், ஆங்கிலம் என்ற இரு மொழிக் கொள்கையின்படியே அதிமுக அரசு செயல்பட்டுவருகிறது. தமிழ் மொழிக்கு எவ்வித பாதிப்பும் ஏற்படாமல் அதன் செழுமைக்கு அதிமுக என்றும் பாடுபடும்.

மதுரை இரண்டாவது தலைநகர் என்ற எங்களது கருத்தை நாங்கள் பதிவு செய்துள்ளோம். இதுகுறித்து முதலமைச்சர் முடிவெடுத்து அறிவிப்பார். அமைச்சர் பதவியை விட மதுரை இரண்டாம் தலைநகர் என்ற எனது கோரிக்கைக்கு நான் முக்கியத்துவம் அளிப்பேன்.

அதிமுக-வின் அடுத்த முதலமைச்சர் வேட்பாளர் யார் என்று தலைமை கழகம் கூடி முடிவெடுக்கும் அதுகுறித்து எங்கும் கருத்து தெரிவிக்கக்கூடாது என்பது தலைமையின் கட்டளை.

இத்தனை மாதங்களாக திமுகவின் பொதுச்செயலாளர் பதவி ஏன் நிரப்பப்படவில்லை? அந்த கட்சியில் தலைவர்கள்தான் அதிகமாக உள்ளனர் . தொண்டர்கள் இல்லை.

தற்போது மௌனத்தில் இருக்கும் மு.க.அழகிரி தனது மௌனத்தை கலைத்தார் என்றால் திமுகவில் மிகப் பெரிய பூகம்பமே வெடிக்கும்

மக்களால் தேர்வு செய்யப்பட்ட பிரதிநிதிகள், முதலமைச்சர் விழாவில் பங்கேற்கலாம். ஆனால், அவர்கள் கரோனா பரிசோதனை செய்துவிட்டு வர வேண்டும்” என்றார்.