'விருது கொடுத்தவரை உதைப்பேன் எனும் ஸ்டாலின் பேச்சு' - பதிலளித்த அமைச்சர் ஆர்.பி.உதயகுமார்

மதுரை : ஐந்து முறை ஆட்சியில் இருந்தும் எந்தவிதமான விருதுகளையும் மக்கள் செல்வாக்குகளையும் பெற முடியாத விரக்தியில் ஸ்டாலின் உள்ளதாக அமைச்சர் உதயகுமார் விமர்சனம் செய்துள்ளார்.

மதுரை மாவட்டம் கீழ் திருமங்கலம், கள்ளிக்குடி, கல்லுப்பட்டி ஆகியப்பகுதிகளில் ஒரு வழித்தட சாலையினை இரு வழித்தடமாக மாற்றி, அமைப்பதற்கான 602 லட்சம் ரூபாய் மதிப்புள்ள பூமி பூஜை நெடுஞ்சாலைத்துறை சார்பில் நடத்தப்பட்டது. இந்த ஒருங்கிணைந்த சாலை மேம்பாட்டுத் திட்ட விழாவினை வருவாய், பேரிடர் மேலாண்மை மற்றும் தகவல் தொழில்நுட்பத்துறை அமைச்சர் ஆர்.பி.உதயகுமார் தொடங்கி வைத்தார்.

பின்னர் செய்தியாளர்களைச் சந்தித்து பேசிய அமைச்சர் ஆர்.பி. உதயகுமார், 'சட்டம் ஒழுங்கைப் பாதுகாக்கின்ற, வளர்ச்சி மிகுந்த மாநிலமாக தமிழ்நாட்டை முதலமைச்சர் எடப்பாடி பழனிசாமி உருவாக்கியுள்ளதாகவும்; அதனைப் பொறுத்துக் கொள்ள முடியாத ஸ்டாலின் எப்படி ஒரு பழத்திற்காக ஏங்கி ஏங்கி கடைசியில் அந்தப் பழம் கிடைக்கவில்லை என்றால், ச்சீ... இந்தப் பழம் புளிக்கும் என்று சொல்வார்களோ... அதுபோல் ஐந்து முறை ஆட்சியில் இருந்தும் எந்தவிதமான விருதுகளையும் அங்கீகாரங்களையும் மக்கள் செல்வாக்குகளையும் பெற முடியவில்லை" எனத் தெரிவித்தார்.

தற்போது தமிழ் இனத்திற்கு கிடைத்துள்ள மாபெரும் சிறப்பினை பொறுத்துக் கொள்ள முடியாத எதிர்க்கட்சித் தலைவர் மு.க. ஸ்டாலின் அரசியல் நாகரிகத்தை கடந்து பேசுகிறார் என்றால், அது அவருடைய இயலாமையைக் காட்டுகிறதாகவும் கூறினார்.

'இன்று தமிழ்நாடு அரசிற்கு கொடுக்கப்பட்டுள்ள இந்த விருது ஏதோ எடுத்தோம்; கவிழ்த்தோம் என்று கொடுக்கப்படவில்லை. முழுமையாக ஆராய்ந்து முன்னாள் பிரதமர் வாஜ்பாயின் பிறந்த நாளன்று 'நல்லாட்சி நடத்துகின்ற நாடு' என தமிழ்நாட்டினை அடையாளப்படுத்தி இருக்கின்றனர்.

இதனைப் பொறுத்துக் கொள்ள முடியாமல் பல்வேறு காழ்ப்புணர்ச்சியில் திமுக கட்சியினர் அவதூறு பரப்பினார்கள். களங்கம் ஏற்படுத்த பார்த்தார்கள். அது மக்களிடத்தில் எதுவும் எடுபடவில்லை.

எனவே, இப்போது இறுதியில் விருது கொடுத்தவர்களை அடிப்போம் என சொல்லுகிற வகையில் அவர்களது உள்ளத்தில் உள்ள உணர்வுகளை கூறியுள்ளார்கள். இதனை தமிழ்நாடு மக்கள் நன்கு புரிந்து கொண்டு வருகின்றத் தேர்தலில் அவர்களுக்குத் தக்க பாடம் புகட்டுவார்கள்' என்றும் தெரிவித்தார்.

மேலும் தமிழினத்திற்குத் துரோகியாக உள்ளவரே தமிழினத்திற்குக் கிடைத்த பெருமையை ஏற்றுக்கொள்ள மறுக்கிறார் என்றும் திமுக தலைவர் பற்றி மக்கள் பேசுவதை எல்லாம் நாங்கள் கேட்டுக் கொண்டுதான் இருக்கிறோம் எனவும் கூறினார்.

'இது ஒட்டுமொத்த தமிழ் இனத்திற்குக் கிடைத்த அடையாளம். இதனை மத்திய அரசு கொடுத்துள்ளது என்றால், இது நமக்குக் கிடைத்த பெருமை. ஆகவே, இந்த பெருமையை நாம் ஏற்றுக்கொள்ளாவிட்டாலும் அதில் களங்கம் கற்பிப்பது, குற்றம் கண்டுபிடிப்பது, விவாதம் செய்வது என்பது ஏற்றுக்கொள்ள முடியாத நிலை என்பதை எதிர்க்கட்சி தலைவருக்குத் தெரிவித்துக் கொள்ள வேண்டும்’ எனக் கூறினார்.

இதையும் படிங்க :சரியான நேரம் இதுவே என்பதால் பாஜக அரசு இதனைச் செய்கிறது’ - இந்து ராம் பேச்சு