பாலமேட்டில் 'தர்பார்' அமைத்த காளைகள் - சிறந்த வீரருக்கு கார் பரிசு

மதுரை: பாலமேட்டில் நடைபெற்ற ஜல்லிக்கட்டு விளையாட்டில் சிறந்த வீரருக்கு பரிசாக கார் வழங்கப்பட்டது,

மாட்டு பொங்கல் மற்றும் திருவள்ளுவர் தினம் கொண்டாடப்படும் இன்றைய நாளில் மதுரை மாவட்டம் பாலமேட்டில் ஜல்லிக்கட்டு போட்டி கோலாகலமாக நிறைவுற்றது. காலை 8.30 மணிக்கு தொடங்கிய ஜல்லிக்கட்டு போட்டி மாலை 5 மணி வரை நடைபெற்றது. ஒன்பது சுற்றுகளாக நடைபெற்ற போட்டியில் 669 காளைகளும், 675 மாடுபிடி வீரர்களும் பங்கேற்றனர்.

மாடுபிடி வீரர்களை பல்லாயிரக்கணக்கான மக்கள் கலந்துகொண்டு ஆர்ப்பரித்து உற்சாகப்படுத்தினர். மதுரை மாவட்டத்தின் பல்வேறு பகுதிகளைச் சேர்ந்த மாடுபிடி வீரர்கள் பங்கேற்று மிக ஆர்வத்துடன் காளைகளை பிடித்து விளையாட்டு காட்டினர். மாடுபிடி வீரர்கள் காளைகளை அடக்க முயன்றாலும், பல காளைகள் காளையர்களை வாடிவாசலை விட்டு ஓட்டம் பிடிக்க வைத்தது.

அதிலும், முக்கியமாக வாடிவாசலில் தர்பார் அமைத்து காளைகளால், மாடுபிடி வீரர்கள் தலைதெறிக்க ஓடிய காட்சி பார்வையாளர்களை அதிசயிக்க வைத்தது. இந்நிலையில், அதிக காளைகளை பிடித்த பொதும்பு கிராமத்தைச் சேர்ந்த பிரபாகரனுக்கு கார் பரிசாக வழங்கப்பட்டது. மேலும், சிறந்த ஜல்லிக்கட்டு காளைக்கு நாட்டு பசுமாடு, கன்றுக்குட்டி வழங்கப்பட்டது.