இரண்டு நாட்களுக்கு ஒருமுறை தண்ணீர் வழங்க வேண்டும்; சு. வெங்கடேசன் கோரிக்கை

மதுரை: நான்கு நாட்களுக்கு ஒருமுறை தண்ணீர் விநியோகம் செய்து வரும் நிலையில், அதனை இரண்டு நாட்களுக்கு ஒருமுறையாக மாற்ற வலியுறுத்தி மக்களவை உறுப்பினர் வெங்கடேசன் மாநகராட்சி ஆணையர் மற்றும் மாவட்ட ஆட்சியரிடம் மனு அளித்துள்ளார்.

மதுரை மாநகராட்சி விரிவாக்க பகுதிகளில் குடிநீர் மற்றும் பாதாள சாக்கடை பணிகளை உடனடியாக தொடங்க வேண்டும், முல்லைப் பெரியாறு அணையில் இருந்து வைகை அணைக்கு உடனடியாக தண்ணீர் திறக்க வேண்டும் உள்ளிட்ட கோரிக்கைகளை வலியுறுத்தி மதுரை மக்களவை உறுப்பினர் சு. வெங்கடேசன், கிழக்கு தொகுதி சட்டப்பேரவை உறுப்பினர் பி. மூர்த்தி ஆகியோர் மாநகராட்சி ஆணையர் மற்றும் மாவட்ட ஆட்சியர் ஆகியோரை நேரில் சந்தித்து மனு அளித்தனர்.

பின்னர் செய்தியாளர்களுக்கு பேட்டியளித்த எம்.பி வெங்கடேசன், முல்லைப் பெரியாறு அணைப் பகுதியில் தற்போது நீர் இருப்பு 136 அடியாக உள்ள போது, வைகை அணையில் 30 அடிதான் நீர் உள்ளது என்றார். தற்போது நீர் வரத்து அதிகரித்துள்ள நிலையில் தண்ணீர் திறந்து விட்டால் மதுரை மாவட்டத்தில் விவசாயம் மற்றும் குடிநீர் பற்றாக்குறையை போக்க முடியும் என்றும், இது குறித்து மாவட்ட ஆட்சியரிடம் வலியுறுத்தி உள்ளதாகவும் கூறினார்.

மேலும், அடுத்த மூன்று ஆண்டுகளில் எய்ம்ஸ் மருத்துவமனை பணிகள் முடிவடையும் என்று மத்திய அரசு அறிவித்துள்ளது என்றார்.

பாதாள சாக்கடை பணிகளுக்கான திட்டங்களை நிறைவேற்றுவது தொடர்பான திட்ட அறிக்கையை கிழக்கு தொகுதி சட்டப்பேரவை உறுப்பினர் மூர்த்தி, திட்டக் குழுவுக்கு அனுப்பி வைத்துள்ளதாகவும் வெங்கடேசன் கூறினார்.

இதற்காக ரூ.350 கோடி ஒதுக்கீடு செய்ய வேண்டும் என்று அந்தத் திட்ட குறிப்பில் தெரிவிக்கப்பட்டுள்ளதாகவும், மாநகராட்சி நிர்வாகம் விரிவாக்க பகுதிகளில் குடிநீர் பற்றாக்குறையை போக்குவதற்கும், பாதாள சாக்கடை பணிகளை விரைந்து முடிப்பதற்கான பணிகளை தொடங்க வேண்டும் என வலியுறுத்தியுள்ளதாகவும் கூறினார். மேலும் நான்கு நாட்களுக்கு ஒருமுறை மாநகராட்சிப் பகுதிகளில் குடிநீர் விநியோகம் செய்யப்பட்டு வரும் நிலையில், தற்போது போதிய அளவு தண்ணீர் உள்ளதால் மாநகராட்சி நிர்வாகம் இதில் மாற்றம் கொண்டு வந்து பொதுமக்களின் குடிநீர் பற்றாக்குறையை போக்க வேண்டும் என்று கேட்டுக்கொண்டதாக தெரிவித்தார்.