குடும்ப கட்டுப்பாடு செய்த பெண் கர்ப்பமான விவகாரம்: சுகாதாரத் துறை செயலாளர் பதிலளிக்க நீதிமன்றம் உத்தரவு!

மதுரை: குடும்பக் கட்டுப்பாடு செய்த பெண் கர்ப்பமான விவகாரத்தில் தமிழ்நாடு அரசின் சுகாதாரத் துறை செயலாளர், நெல்லை அரசு மருத்துவமனை முதல்வர், நெல்லை மாவட்ட ஆட்சியர் ஆகியோர் பதிலளிக்க உயர் நீதிமன்ற மதுரை கிளை உத்தரவிட்டுள்ளது.

நெல்லை மாவட்டம் அம்பாசமுத்திரம் அருகில் உள்ள ஊர்க்காடு பகுதியைச் சேர்ந்தவர் ஷிபா (வயது 30). இவர் உயர் நீதிமன்ற மதுரை கிளையில் மனு ஒன்றைத் தாக்கல் செய்தார். அதில்,'எனது தாயார் ரத்தினம் கேரள மாநிலம் திருவனந்தபுரத்தில் உள்ள தேயிலை தோட்டத்தில் பணிபுரிந்தார். அவருடன் இருந்த எனக்கு 13 வயதில் இருந்து வலிப்பு நோய் ஏற்பட்டது.

இதற்காக திருவனந்தபுரம் அரசு மருத்துவமனையில் தொடர் சிகிச்சை பெற்றுவருகிறேன். இந்நிலையில் கடந்த 2010ஆம் ஆண்டு திருமணம் நடைபெற்று, தற்போது இரண்டு ஆண் குழந்தைகள் உள்ளனர்.

அதனைத்தொடர்ந்து எனது வலிப்பு நோயை கருத்தில் கொண்டு குடும்ப கட்டுப்பாட்டு அறுவை சிகிச்சை செய்ய முடிவு செய்து, 2014ஆம் ஆண்டு செப்டம்பர் மாதம் 4 ஆம் தேதி குடும்ப கட்டுப்பாடு அறுவை சிகிச்சை நெல்லை அரசு மருத்துவமனையில் நடந்தது.

அதன்பின் தொடர்ந்து வலிப்பு நோய்க்கு மட்டும் மருந்து, மாத்திரைகளை எடுத்து வந்தேன். கடந்த சில மாதங்களுக்கு முன்பிருந்து எனக்கு மாதவிடாய் தடைபட்டது. கேரளாவில் உள்ள தனியார் மருத்துவமனையில் பரிசோதித்தபோது, நான் 17 வாரம் கர்ப்பமாக இருப்பதை உறுதி செய்தனர்.

இந்த தகவலை கேட்டு, நானும் எனது குடும்பத்தினரும் அதிர்ச்சி அடைந்தோம். குடும்ப கட்டுப்பாடு செய்த பிறகும், கரு உருவாகி இருப்பது எனது உடல்நலத்திற்கும், மனநலத்திற்கும் பெரும் பாதிப்பை ஏற்படுத்தி உள்ளது. எனக்கு குடும்ப கட்டுப்பாடு அறுவை சிகிச்சை செய்த அரசு மருத்துவமனை மருத்துவர்கள் குழுவினர் மீது துறை ரீதியான நடவடிக்கையும், குற்ற நடவடிக்கையும் எடுக்க வேண்டும். அரசு செலவில் நெல்லை அரசு மருத்துவமனை முதல்வர் கண்காணிப்பில் எனக்கும் என் வயிற்றில் வளரும் சிசுவுக்கும் தரமான சிகிச்சை அளிக்க நடவடிக்கை எடுக்க வேண்டும். மேலும் எனக்கு ரூ.20 லட்சம் நிவாரணத் தொகை வழங்க உத்தரவிட வேண்டும்' என கூறியிருந்தார்.

இந்த வழக்கு நீதிபதி சுரேஷ்குமார் முன்பு விசாரணைக்கு வந்தது. அப்போது, இதுகுறித்து தமிழ்நாடு அரசின் சுகாதாரத் துறை செயலாளர், நெல்லை அரசு மருத்துவமனை முதல்வர், நெல்லை மாவட்ட ஆட்சியர் ஆகியோர் பதில் அளிக்க உத்தரவிட்டு விசாரணையை ஒத்திவைத்தனர்.