கஞ்சா விற்ற 17வயது சிறுவன் கைது!

மதுரை: காளவாசல் சந்திப்பில் கஞ்சா விற்பனை செய்த 17 வயது சிறுவனை காவல்துறையினர் கைது செய்துள்ளனர்.

கஞ்சா உள்ளிட்ட போதை வஸ்துக்கள் தொடர்பான பல்வேறு செயல்பாடுகளை மதுரை மாநகர காவல்துறை தொடர்ந்து கண்காணித்து நடவடிக்கை மேற்கொண்டு வருகின்றது. கஞ்சா உள்ளிட்ட போதைப் பொருள் விற்பனையில் தொடர்புடைய நபர்களை அதிரடியாகக் கைது செய்தும் வருகிறது.

இந்நிலையில் மதுரை காளவாசல் சந்திப்பு அருகேயுள்ள வணிக வளாகத்தின் முன்புறம் 17வயது சிறுவன் கஞ்சா விற்பதாகக் கிடைத்த தகவலையடுத்து எஸ்எஸ் காலனி காவல் ஆய்வாளர் திலீபன் அப்பகுதிக்குச் சென்று சிறுவனை கைது செய்தார்.

அச்சிறுவனிடமிருந்து 1.350 கி.கி. கஞ்சா பொட்டலங்களும், ரூ.450 ரொக்கமும் பறிமுதல் செய்யப்பட்டன. மேலும் கைதான சிறுவனிடம் காவல்துறையினர் தொடர்ந்து விசாரணை மேற்கொண்டு வருகின்றனர்.

இதையும் படிங்க: கேரளாவுக்கு கஞ்சா கடத்தியவர் கைது - 8 கிலோ கஞ்சா பறிமுதல்