எழுதலின்போதும் மறைதலின்போதும் சூரியன் வந்து வணங்கிச் செல்லும் சிவன் கோயில் ஒன்று மதுரைக்கு அருகேயுள்ளது. பாண்டியர் கால குடைவரைக் கலைநயத்தை இப்போதும் அந்தக் கோயில் வெளிப்படுத்திக் கொண்டிருக்கிறது.
கோயிலின் அமைவிடம்:
மதுரை மாவட்டம் வரிச்சியூரிலிருந்து வலதுபுறம் களிமங்கலம் செல்லும் சாலையின் பிரிவிலிருந்து 3 கி.மீ. தொலைவிலுள்ள குன்னத்தூர் கிராமத்தில்தான் இந்தக் கோயில் அமைந்துள்ளது. குன்னத்தூருக்குச் செல்லும் வழியில், சற்று முன்பாக குன்னத்தூர் குன்று அமைந்துள்ளது. பாண்டியர் காலக் குடைவரைக் கோயில்களில் மிக முக்கியத்துவம் வாய்ந்த, வரலாற்றுச் சிறப்புமிக்க தொல்லியல் பெருமைக்குரிய இடம் இது. இங்குதான் சிவன் பல்வேறு பெயர்களில் அருள்பாலித்துக் கொண்டிருக்கிறார்.
ஒரு காலத்தில் சுப்பிரமணியர் மலை என்று அழைக்கப்பட்ட இக்குன்றின் கிழக்குப்புறத்தில் வீற்றிருக்கும் சிவனை எழும் ஞாயிறும் (உதயசூரியன்) மேற்குப்புறத்தில் வீற்றிருக்கின்ற சிவனை மறையும் ஞாயிறும் (அஸ்தமன சூரியன்) நாள்தோறும் தோன்றி வணங்கி மறைகிறார்கள் என்பது வியப்பிற்குரிய ஒன்று.
குன்னத்தூர் குடைவரை கோயில் கோயிலின் நேர்த்தி:
கோயிலின் முள்வேலிக் கம்பியைக் கடந்து நாம் உள்ளே சென்றோமானால், இந்தப் பாண்டியர்காலக் குடைவரைக் கோயிலின் அழகு அத்தனை நேர்த்தியுடன் ஜொலிக்கிறது. மலையைக் குடைந்து, மலைப் பாறையாலேயே லிங்கமும் ஆவுடையும் நேர்த்தியாய் செதுக்கப்பட்டுள்ளது. இதன் உயரம் மூன்று அடி, விட்டம் நான்கடியாகும். இங்கு தினந்தோறும் அதிகாலையில், கிழக்கே எழும் சூரியக் கதிர்களால் தங்கமயமாய் ஜொலிக்கிறார் இங்கே வீற்றுள்ள தென்னாடுடைய சிவன். உதயகிரீஸ்வரர் என்ற பெயரால் அழைக்கப்படும் இந்த அழகிய குடைவரைக் கோயிலின் வாயிலில் இரண்டு துவாரபாலகர்கள் காவல் காக்கின்ற புடைப்புச்சிற்பம் அத்தனை அழகாய் அமைந்துள்ளது. கோயிலின் இடதுபுறம் விநாயகர் நின்ற கோலத்தில், அற்புதமான தோற்றத்தில் நம்மை ஈர்க்கிறார். மேலும் கருவறையின் நேரெதிரே அமைந்துள்ள நந்தி சிலை, தரையைப் பார்த்தபடி இருப்பது சற்றே வித்தியாசமாக உள்ளது.
கோயிலுக்கு வெளியே உள்ள நந்தி, வலது பக்கம் தலையைத் திருப்பியவாறு உள்ள காட்சி வேறு எந்தக் கோயிலிலும் காணமுடியாத ஒன்று. மலையின் பின்புறம் லிங்கம் மற்றும் ஆவுடையோடு அஸ்தகிரீஸ்வரர் அருள்பாலிக்கிறார். முன் மண்டபம், கருவறை மண்டபம் என சிவன் இங்கே ஏகாந்தமாக வீற்றிருக்கிறார். மாலைப்பொழுதில் கதிரவன், அஸ்தகிரீஸ்வரரிடம் அருளாசி பெற்று மறைவதை காண கண்கோடி வேண்டும்.
தலம் வரலாறு:
இக்குடைவரைக்கோயில், கி.பி. 8ஆம் நூற்றாண்டில் பிற்காலப் பாண்டியர்களால் கட்டப்பட்டது எனத் தொல்லியல் ஆய்வாளர்கள் கூறுகின்றனர். மேலும் உதயகிரீஸ்வரர் கோயில் குறித்த விளக்கங்களோடு கூடிய பெயர்ப்பலகையும் கல்வெட்டும் தமிழ்நாடு தொல்லியல் துறையால் பொறிக்கப்பட்டுள்ளன. அதேபோன்று கீழிருந்து, ஏறக்குறைய 300 அடி உயரத்தில் சிதிலமடைந்து காணப்படும் செங்கல் கட்டுமானத்திலான மூலபாலசிவன் கோயில், ஒரு காலத்தில் சீரும் சிறப்பும் வாய்ந்ததாகத் திகழ்ந்திருக்க வேண்டும் என்பதை அதன் நேர்த்தியும் தொன்மையும் சொல்லாமல் சொல்லுகின்றன.
அஸ்தகிரீஸ்வரர் நந்தி சிலை
கோயிலின் சுற்றுவட்டாரப் பகுதிகள்:
அப்படியே மலையை கிரிவலமாகச் சுற்றிவந்து, மீண்டும் உதயகிரீஸ்வரர் கோயிலுக்கு மிக அருகில் அமைந்துள்ள அந்த வரலாற்றுச் சிறப்புமிக்க குகைக் கோயிலை நோக்கி நடந்துசெல்லும்போது அவ்வழியே அமைந்துள்ள மற்றுமொரு சிவன் கோயில் மிகவும் சிதிலமடைந்து கிடக்கிறது. ஆனாலும் நம் மக்கள் அதனையும் அழகுறப் பேணி, அங்கே சிவலிங்க வழிபாட்டோடு, குலதெய்வ வழிபாட்டிலும் ஈடுபட்டு வருகிறார்கள். தாமரைக் குளத்தை ஒட்டிய இச்சிவன் கோயிலின் முன்புறம், சப்தகன்னியர் குளத்தைக் கண்காணித்தவாறே வீற்றிருக்கிறார்கள் என்பது மற்றுமொரு சிறப்பு.
அருகேயுள்ள குகைக்கோயில் ஒன்றில், ஒருகாலத்தில் ஜைன முனிவர்கள் தங்கி தங்களின் ஆன்மிகச் சேவையோடு, கல்விச்சேவை, மருத்துவச் சேவையினை இக்குன்றினைச் சுற்றி வாழ்ந்த மக்களுக்கு ஆற்றியிருக்கிறார்கள். அவர்கள் தங்கிய 50-க்கும் மேற்பட்ட கற்படுக்கைகள், மருந்துக்குழிகள் உள்பட அவர்கள் தங்கியதற்கான எச்சங்களும் இங்கே தென்படுகின்றன.
குடைவரைக் கோயில் குன்னத்தூர், லிங்கம் இதன் அருகே அமைந்துள்ள கோயிலில் உலகநாதனாய் மற்றொரு சிவன் கருவறையிலிருந்துக் காட்சி தருகிறார். அவருக்கு எதிரே தண்டீஸ்வரர், காலபைரவர், நாகராஜா ஆகியோர் உள்ளனர். உலகநாதன் கருவறை கொண்டுள்ள கோயிலுக்கு அருகே, முருகர் கருவறையில் குடிகொண்டு பக்தர்களுக்கு அருளாசி வழங்குகிறார். உலகநாதன் கோயிலுக்குப் பின்புறம் சித்தர்கள் இருவர் ஜீவசமாதி அடைந்திருப்பதாக அப்பகுதி மக்கள் நம்புகிறார்கள். சமாதிக்குரிய அமைப்புடன் உள்ள அவ்விடத்தை, நாள்தோறும் அப்பகுதி மக்கள் பூஜித்து வருகிறார்கள்.
பக்தர்கள் தரிசனம்:
ஒவ்வொரு நாளும் காலை 6 மணியிலிருந்து மாலை 5 மணிவரை கோயில் பக்தர்களின் சேவைக்காகத் திறந்துவைக்கப்படுகிறது என்று அக்கோயிலின் பூசாரி ராமலிங்கம் கூறுகிறார். இங்குள்ள மலைக்கோயில்களை பரம்பரை, பரம்பரையாய் நிர்வகித்து வருகின்ற பரமேஸ்வரன் பேசுகையில், ”இங்கு மாதந்தோறும் குறைந்தபட்சம் மூன்றிலிருந்து பத்து திருமணங்கள்வரை நடைபெறுகின்றன. திருமணங்கள் அதிகம் நடைபெறுகின்ற காரணத்தால் திருமண மண்டபம் ஒன்று கட்டித்தர மதுரை மாவட்ட ஆட்சியரிடமும் மதுரை மக்களவை உறுப்பினரிடமும் கோரிக்கை வைத்துள்ளோம். அது நிறைவேறினால் எங்களது பெருங்குறை தீரும்” என்றும் கூறினார்.
kunnathur-asthagiriswarar-cave-temple மதுரை வானொலி நிலையத்தின் முன்னாள் இயக்குநர் சோமாஸ்கந்தமூர்த்தி கூறுகையில், "அகிலாண்ட கோடி பிரமாண்ட நாயகி என்று போற்றப்படும் மீனாட்சிம்மன் கோயில் மட்டுமே மதுரையின் அடையாளம் என்பதோடு நின்றுவிடாமல், மதுரையைச் சுற்றியுள்ள இப்புனிதத் தலங்களையும், குறிப்பாக எழும் ஞாயிறும் மறையும் ஞாயிறும் ஒருசேர சிவனை தரிசிக்கின்ற கோயில்களும் மதுரையின் அடையாளங்களில் ஒன்றுதான் என்பதை உணர்ந்து ஆன்மிகப் பெருமக்களும் சரி, சுற்றுலாச் சென்று அதன்மூலம் இன்புறுகின்ற பயணிகளுக்கும் சரி மிக அற்புதமான ஒரு தலம்தான் இந்தக் குன்னத்தூர் குன்று" என்று மனம் நெகிழக் கூறி இப்பயணத்தை முடித்துவைத்தார்.
இதையும் படிங்க:
கொள்ளை முயற்சி முறியடித்த கோயில் அலாரம்!!
