மதுரை பசுமலையைச் சேர்ந்த தளபதி என்பவர் உயர் நீதிமன்ற மதுரைக்கிளையில் மனு ஒன்றைத் தாக்கல் செய்திருந்தார். அதில், "தமிழ்நாட்டில் 1969ஆம் ஆண்டு முதல் 2011ஆம் ஆண்டு வரை 5 முறை முதலமைச்சராக இருந்தவர் மு.கருணாநிதி. தமிழ்நாட்டின் முதலமைச்சராக 6,863 நாட்கள் பொறுப்பு வகித்துள்ளார்.
அதோடு 10 முறை திமுகவின் தலைவராக பொறுப்பு வகித்துள்ளார். போட்டியிட்ட அனைத்துத் தொகுதிகளிலும் வெற்றி பெற்ற புகழுக்குரியவர். அவர், கடந்த 2018ஆம் ஆண்டு ஆகஸ்ட் 7ஆம் தேதி தனது 94ஆவது வயதில் உயிரிழந்தார். அத்தகைய புகழ்மிகு மனிதருக்கு மதுரையில் சிலை வைக்க அனுமதி கோரி செப்டம்பர் 2018ல் மனு அளித்தும் இதுவரை எவ்வித நடவடிக்கையும் இல்லை.
அவர் அரசியல்வாதி மட்டுமல்ல, சிறந்த எழுத்தாளரும் கூட. தஞ்சை தமிழ் பல்கலைக்கழகத்தால் அவரது எழுத்துப்பணிக்கு ராஜராஜன் விருது வழங்கப்பட்டுள்ளது. மதுரையில் அவருக்கு சிலை வைத்தால், அவருக்கு மரியாதை செலுத்தும் வகையில் அமையும். ஆனால், ஆளும் கட்சியின் தலைவர்களுக்கு சிலை வைக்க அனுமதி வழங்கும் அரசு நிர்வாகம், கலைஞர். கருணாநிதிக்கு சிலை வைக்க அனுமதியளிக்க தற்போது வரை எந்த நடவடிக்கையும் எடுக்கவில்லை.