விளையாட்டு காட்டிய புதுகை மாடு... 14 காளைகளை அடக்கிய ஜெய்ஹிந்த்புரம் விஜய்!

மதுரை: அவனியாபுரம் ஜல்லிக்கட்டில் 14 காளைகளை அடக்கிய ஜெய்ஹிந்த்புரத்தைச் சேர்ந்த விஜய் சிறந்த மாடுபிடி வீரராக தேர்ந்தெடுக்கப்பட்டார்.

தை திருநாளின் முதல் நாளான இன்று பொங்கல் கொண்டாட்டம் உலகம் முழுவதும் உள்ள தமிழர்களால் கோலாகலமாக கொண்டாடப்பட்டு வருகிறது. தை திருநாளில் தமிழர்களின் பாரம்பரியத்தையும், வீரத்தையும் பறைசாற்றும் விதமாக மதுரை மாவட்டம் அவனியாபுரத்தில் ஜல்லிக்கட்டு திருவிழா கோலாகலமாக நடைபெற்றது. இதில் மதுரை மாவட்டத்தின் பல்வேறு பகுதிகளிலிருந்தும் மாடுபிடி வீரர்கள் பங்கேற்றனர்.

தமிழ்நாடு வருவாய் மற்றும் பேரிடர் மேலாண்மைத் துறை அமைச்சர் ஆர்.பி. உதயகுமார் ஜல்லிக்கட்டு போட்டியை தொடங்கிவைத்தார். ஓய்வு பெற்ற நீதிபதி மாணிக்கம், மதுரை மாவட்ட ஆட்சியர் வினய், மதுரை மாநகராட்சி ஆணையர் விசாகன், மதுரை மாநகர காவல் துறை ஆணையர் டேவிட்சன் தேவாசீர்வாதம் உள்ளிட்டோர் கலந்துகொண்டனர். காலை 8 மணிக்கு தொடங்கிய ஜல்லிக்கட்டு போட்டிகள் மாலை 4.30 மணி வரை நடைபெற்றது.

இதில், 8 அணிகள் பங்கேற்றன. ஏறக்குறைய 630 காளைகள் அவிழ்க்கப்பட்டன. 600 வீரர்கள் பங்கேற்றனர். இந்த ஜல்லிக்கட்டு போட்டியில், மதுரை ஜெய்ஹிந்த்புரத்தைச் சேர்ந்த விஜய் என்ற இளைஞர் 14 காளைகளை பிடித்து சிறந்த மாடுபிடி வீரராக தேர்ந்தெடுக்கப்பட்டார். சோலை அழகுபுரத்தைச் சேர்ந்த பரத்குமார் 13 காளைகளைப் பிடித்து இரண்டாவது வீரராகவும், முத்துபட்டியைச் சேர்ந்த திருநாவுக்கரசு 10 காளைகளை பிடித்து மூன்றாவது வீரராகவும் தேர்வு செய்யப்பட்டனர்.

இதில், சிறந்த மாடுபிடி வீரரான விஜய்க்கு திருப்பரங்குன்றம் சட்டப்பேரவை உறுப்பினர் சரவணன் இருசக்கர வாகனத்தை பரிசளித்தார். புதுக்கோட்டையைச் சேர்ந்த காவல் துறை ஆய்வாளர் அனுராதா என்பவரின் காளை சிறந்த காளைக்கான முதல் பரிசைப் பெற்றது. மதுரையைச் சேர்ந்த ஜி.ஆர். கார்த்திக் என்பவரின் காளை இரண்டாவது சிறந்த காளையாக தேர்வானது.