தென் மாவட்டங்களின் மாநகரம் என்ற அடையாளத்துடன் இருக்கும் மதுரைக்கு முக்கிய அடையாளமாகத் திகழ்ந்துவருவது மதுரை காமராசர் பல்கலைக்கழகம். பிப்ரவரி 6ஆம் தேதியன்று (இன்று) தனது 54ஆம் வயதை அப்பல்கலைக்கழகம் தொடுகிறது. ஆற்றல்சால் பல்கலைக்கழகம் என்று தனது முகப்பில் கம்பீரமான பதிவைக் கொண்டு பல லட்சம் மாணவர்களை உருவாக்கி சமூக மேம்பாட்டிற்கு தன்னுடைய பங்களிப்பை செய்துகொண்டே இருக்கிறது.
மதுரை காமராசர் பல்கலைக்கழகம் 1966ஆம் ஆண்டு பிப்ரவரி 6ஆம் நாள் அன்றைய தமிழ்நாடு முதலமைச்சர் பக்தவச்சலத்தால் தொடங்கப்பட்டு, தற்போதுவரை 20 புலங்களுக்கு உட்பட்ட 77 துறைகளுடன் 44 முதுகலை, 40 எம்.பில், 57 முனைவர் பட்டங்களுக்கான படிப்புகளோடு, 17 பட்டய மற்றும் சான்றிதழ் படிப்புகளையும் வழங்கி மாணவ தலைமுறையின் அறிவுசார் புரட்சிக்கு தொடர்ந்து வித்திட்டுவருகிறது.
இந்தப் பல்கலைக்கழகத்தின் 17ஆவது துணைவேந்தராகப் பொறுப்பு வகித்துவரும் முனைவர் கிருஷ்ணன் பேசுகையில், ”மதுரை காமராசர் பலகலைக்கழகம், பல்கலைக்கழகங்களுக்கான உலகத் தரவரிசைப் பட்டியலுக்குள் இடம்பெற்றுள்ளது மகிழ்ச்சியான செய்தி. உலகத்தில் எங்கேனும் ஓரிடத்திற்குச் செல்ல நேர்ந்தால், இந்தப் பல்கலைக்கழகத்தில் பயின்ற ஒரு மாணவரையேனும் சந்திக்க முடிகிறது” என்கிறார்.
உலகத்தரம் வாய்ந்த நூலகம் மதுரை காமராசர் பல்கலைக்கழகத்தில் இயங்கிவருகிறது. நவீன முறையில் ஒழுங்குபடுத்தப்பட்ட முறைகளோடு இயங்கிவரும் இந்த நூலகத்தில் மட்டும் 3 லட்சத்திற்கும் அதிகமான நூல்கள் உள்ளன. தற்போது அரிய பல நூல்கள், ஓலைச்சுவடிகள் ஆகியவற்றை டிஜிட்டல் மயமாக்குவதோடு அரிய நூல்களை பொதுமக்களும் வழங்க பல்கலைக்கழகம் வேண்டுகோள் விடுத்துள்ளது.
துணைவேந்தர் கிருஷ்ணன் கூறுகையில், ”சிறந்து விளங்கும் பேராசியர்களுக்கு வழங்கப்படும் சாந்தி ஸ்வரூப் பட்நாகர் எனும் தேசிய விருதை ஒரே நேரத்தில் 4 பேராசிரியர்கள் பெற்று சாதனை படைத்தது மதுரை காமராசர் பல்கலைக்கழகம் மட்டுமே. தேசிய தர மதிப்பீட்டுக் குழுவின் A++ தகுதியைப் பெறுவதே பல்கலைக்கழகத்தின் அடுத்த இலக்கு” என்றார்.
துணைவேந்தர் முனைவர் கிருஷ்ணன் மதுரை பல்கலைக்கழகம் என்ற பெயரால் முன்னர் அறியப்பட்ட இந்தப் பல்கலைக்கழகம் 1978ஆம் ஆண்டு தமிழ்நாடு முன்னாள் முதலமைச்சர் காமராசர் பெயரால் மாற்றம் செய்யப்பட்டது. தெ.பொ. மீனாட்சிசுந்தரனார், மு. வரதராசனார், வ.செ. குழந்தைசாமி, வ.சுப. மாணிக்கனார் போன்ற தமிழறிஞர்களை துணைவேந்தர்களாகக் கொண்டு சிறந்து விளங்கிய பெருமை கொண்ட பல்கலைக்கழகமாகும்.
தஞ்சை தமிழ்ப் பல்கலைக்கழகத்தின் முன்னாள் துணைவேந்தர் மா. திருமலை கூறுகையில், ”மதுரை பல்கலைக்கழகத்தில் பணியாற்றி, தமிழ்நாட்டிலுள்ள பிற பல்கலைக்கழகங்களுக்கு துணைவேந்தராகச் சென்றவர்கள் 12க்கும் மேற்பட்டவர்களாவர். வேறு எந்தப் பல்கலைக்கழகத்திற்கும் இந்தப் பெருமை கிடையாது. அதேபோன்று எல்லோருக்கும் கல்வி கிடைப்பதற்காகவே அஞ்சல் வழியில் கல்வி தொடங்கியது மதுரை காமராசர் பல்கலைக்கழகம்தான்” என்றார்.
முன்னாள் துணைவேந்தர் மா.திருமலை கிராமம் சார்ந்து இயங்கிய கல்விச்சாலை என்பதால், பாமர மக்களும் வந்து செல்வதற்கு ஏற்றவாறு மதுரை-தேனி நெடுஞ்சாலையில் காமராசர் பல்கலைக்கழகம் அமைந்ததுடன், அனைத்துத் துறைகளும் அருகருகே அமையுமாறு வடிவமைக்கப்பட்டது. ஏறக்குறைய 650 ஏக்கர் பரப்பளவைக் கொண்ட இப்பல்கலைக்கழத்திற்கு, நீதிக்கட்சியின் நிறுவனர்களுள் ஒருவரான பி.டி. ராஜன் தனக்குரிய பெரும்பகுதி நிலங்களை தானமாக வழங்கினார். பல்கலைக்கழகத்தைச் சுற்றியுள்ள கிராமங்களைச் சேர்ந்த மக்கள் தங்களது நிலங்களையும் குறைந்த விலைக்கு வழங்கி சிறப்பு செய்தனர்.
முன்னாள் துணைவேந்தர் மா. திருமலை மேலும் கூறுகையில், ”மதுரையில் தமிழ்நாடு அரசின் சார்பாக 1981ஆம் ஆண்டு நடைபெற்ற 5ஆம் உலகத்தமிழ் மாநாட்டில் மதுரை காமராசர் பல்கலைக்கழகம் மகத்தான பங்களிப்பை வழங்கியது. அச்சமயம் தமிழ் மொழி குறித்த கருத்தரங்குகளும் நூல் வெளியீடுகளும் பல்கலைக்கழக வளாகத்தில் நடைபெற்றன. அச்சமயம் வெளியான 'உலகத்தமிழ்' எனும் சிறிய நூல் பல்கலைக்கழகத்தின் சிறப்பான பங்களிப்பாகும்” என்றார்.
முன்னாள் துணைவேந்தர் மா.திருமலை அண்மையில் மின்னணு தகவல் மூல வளங்களை அதிகளவில் தரவிறக்கிப் பயன்படுத்திய பல்கலைக்கழகம் என்ற விருதோடு, கீழடி அகழாய்விலும் தமிழ்நாட்டின் தொல்லியல் துறையுடன் கைகோத்த்துச் செயல்படத் தொடங்கியுள்ள மதுரை காமராசர் பல்கலைக்கழகம், கிடைக்கும் சந்தர்ப்பங்களிலெல்லாம் தன்னை மேலும் மேலும் செம்மைப்படுத்தி தேசிய தரத்திற்கு உயர்த்திக் கொண்டே இருக்கிறது என்றால் அது வெறும் புகழ் மொழியல்ல...!
