சேர்த்தால் உதயம்; தவிர்த்தால் அஸ்தமனம் - திமுகவை மிரட்டும் அழகிரி பிறந்தநாள் சுவரொட்டிகள்

சென்னை: அழகிரியின் பிறந்தநாள் கொண்டாட்டத்தை முன்னிட்டு 'சேர்த்தால் உதயம்; தவிர்த்தால் அஸ்தமனம்' எனச் சுவரொட்டிகள் மதுரை நகர் முழுவதும் ஒட்டப்பட்டு பரபரப்பை கிளப்பியுள்ளன.

திமுகவின் முன்னாள் தென் மண்டல அமைப்புச் செயலாளரும் முன்னாள் மத்திய அமைச்சருமான மு.க. அழகிரி கட்சியிலிருந்து நீக்கப்பட்டு சில ஆண்டுகள் ஆகின்றன. இந்நிலையில் அவ்வப்போது ஏதேனும் பரபரப்பை கிளப்பும் வகையில் அழகிரி திமுகவுக்கு எதிராகவும் அக்கட்சியின் தலைவர் ஸ்டாலினுக்கு எதிராகவும் கருத்து தெரிவித்துவருகிறார்.

சுவரொட்டிகள்

அண்மையில் அவரது ஆதரவாளர்களைக் கூட்டி திமுகவுக்கு நேரடியாகச் சவால்விட்டார். ஜனவரி 30ஆம் தேதி மு.க. அழகிரியின் பிறந்தநாள் என்பதால் மதுரை நகர் முழுவதும் அவரது ஆதரவாளர்கள் திமுகவை மிரட்டும் வகையில் சுவரொட்டிகளை ஒட்டி அமர்க்களப்படுத்தி உள்ளனர்.

கட்சியில் தங்களைச் சேர்ப்பது குறித்து அவர்கள் வெளியிட்ட சுவரொட்டி ஒன்றில், 'சேர்த்தால் உதயம்; தவிர்த்தால் அஸ்தமனம்' என வாசகங்கள் இடம்பெறச் செய்துள்ளனர்.

சுவரொட்டிகள்

அதேபோன்று திமுக ஆட்சி அமைக்க ஐ-பேக் தேவையில்லை. கருணாநிதியின் மூளையான மு.க. அழகிரி மட்டும்போதும் என்று குறிப்பிடும் சுவரொட்டிகளையும் ஒட்டியுள்ளனர்.