தொழிலதிபர் வீட்டில் 23 கிலோ வெள்ளி பொருட்கள் திருட்டு!

மதுரை: தொழிலதிபர் வீட்டின் பூட்டை உடைத்து ஆறு பவுன் தங்கம், 23 கிலோ வெள்ளிப் பொருட்களை கொள்ளை அடித்து சென்ற நபர்களை காவல் துறையினர் தேடிவருகின்றனர்.

மதுரை கே.கே. நகர் பகுதியில் தொழிலதிபர் ராஜேஷ் குமார் என்பவர் தன் குடும்பத்துடன் வசித்து வருகிறார். இந்நிலையில் கடந்த 8 ஆம் தேதி அவர் குடும்பத்துடன் வெளியூர் சென்றார். இதனால் ஆள் இல்லாத வீட்டில் நுழைந்த அடையாளம் தெரியாத நபர்கள், பீரோவில் இருந்த ஆறு பவுன் தங்க நகையும், 23 கிலோ வெள்ளிப் பொருட்களையும் திருடிச் சென்றனர்.

இந்நிலையில், வெளியூர் பயணத்தை முடித்துக்கொண்டு வீடு திரும்பிய ராஜேஷ், வீட்டில் நகை, வெள்ளி பொருட்கள் திருடப்பட்டதை அறிந்து அதிர்ச்சி அடைந்தார். இது குறித்து அண்ணாநகர் காவல்நிலையத்தில் புகார் அளித்தார். இதன் பேரில், அவர் வீட்டுக்கு மோப்ப நாய் உதவியுடன் தடயங்களை சேகரித்த காவல்துறையினர், வழக்குப்பதிவு செய்து கொள்ளையர்களை தேடி வருகின்றனர்.