கிருஷ்ணகிரி மாவட்டம் ஓசூர் நகரின் முக்கிய நீர் ஆதாரமான ராமநாயக்கன் ஏரியின் நீர்வரத்து வாய்க்கால்கள் ஆக்கிரமிக்கப்பட்டு, பல ஆண்டுகளாக நீரின்றி வறண்டு காணப்படுகிறது. கெலவரப்பள்ளி அணையிலிருந்து, இந்த ஏரிக்கு தண்ணீர் கொண்டு வர கோரிக்கை எழுந்ததால், மாநகராட்சி நிர்வாகம் சார்பில், 24.50 லட்சம் ரூபாயும், தேசிய நெடுஞ்சாலை ஆணையம் சார்பில், 25.50 லட்சம் ரூபாயும் வழங்கப்பட்டு பணிகள் தொடங்கப்பட்டன. ஆனால், பணிகள் நிறைவடைந்தாலும் தண்ணீர் வரத்து இல்லை.
இந்நிலையில் ஏரியை கிருஷ்ணகிரி எம்பி செல்லகுமார் ஆய்வு செய்தார். ஆய்வுக்கு பின்னர் அவர் பேசியதாவது, கெலவரப்பள்ளி அணையிலிருந்து ராமநாயக்கன் ஏரிக்கு நீர் கொண்டு வரவேண்டும் என்பது ஓசூர் பகுதி மக்களின் நீண்ட நாள் கோரிக்கை. ஏரியை மேம்படுத்த பல லட்சம் செலவு செய்தும், தண்ணீர் கொண்டு வரவில்லை என்பது வேதனையளிக்கிறது. தேன்கனிக்கோட்டை சாலையில் உள்ள கேட் வால்வை திறந்திருந்தால் தண்ணீர் இயல்பாகவே பாய்ந்திருக்கும். 200 ஏக்கர் அளவிலிருந்த ஏரி தற்போது ஆக்கிரமிப்புகளால் சுருங்கியுள்ளது.