சுகாதாரம் மற்றும் அடிப்படை வசதிகளை உடனுக்குடன் நிறைவேற்றிட வேண்டும்- பீலா ராஜேஷ்

கிருஷ்ணகிரி:சுகாதாரம் மற்றும் அடிப்படை வசதிகளை உடனுக்குடன் நிறைவேற்றிட வேண்டும் என மாவட்ட ஆட்சியர் அலுவலகத்தில் நடைபெற்ற வளர்ச்சி பணிகள் குறித்த ஆய்வுக்கூட்டத்தில், மாவட்ட கணிப்பாய்வு அலுவலர் திருமதி.பீலா ராஜேஷ் தெரிவித்துள்ளார்.

கிருஷ்ணகிரி மாவட்ட ஆட்சியர் அலுவலகத்தில் மாவட்ட கணிப்பாய்வு மற்றும் வளர்ச்சி பணிகள் குறித்த ஆய்வுக் கூட்டம் மாவட்ட கணிப்பாய்வு அலுவலர் திருமதி பீலா ராஜேஷ் தலைமையில் நடைபெற்றது.

இக்கூட்டத்தில் உரையாற்றிய அவர்," தமிழ்நாட்டில் வரவுள்ள மழைக்காலங்களில் மக்களுக்கு அதிக பாதிப்பு ஏற்படாமல் இருப்பதற்கு முன்னெச்செரிக்கை நடவடிக்கை எடுக்க அலுவலர்களுக்கு அறிவுறுத்தப்பட்டுள்ளது.

மாவட்டத்தில் 35 இடங்கள் மழையால் அதிக சேதத்திற்குள்ளாகும் என்று கருதப்படுகிறது. அவ்வாறு கருதப்படும் இடங்களில் பேரிடர் மேலாண்மைகுழுக்கள் தயார் நிலையில் இருக்கவும், 24 மணி நேரமும் கட்டுப்பாட்டு அறையுடன் தொடர்பில் இருக்குமாறும் அறிவுறுத்தப்பட்டுள்ளது.

மாவட்டத்தில் உள்ள அனைத்து அரசு மருத்துவமனை மற்றும் ஆரம்ப சுகாதார நிலையங்களிலும் போதிய அளவுக்கு மருந்து மாத்திரைகள் இருப்பு வைக்கப்பட்டுள்ளன. மேலும், டெங்கு பற்றிய விழிப்புணர்வை ஒவ்வொரு கிராமங்களுக்கும் சென்று ஏற்படுத்த வேண்டும்.

பருவமழைக்காலங்களில் ஏற்படும் நோய் தொற்றுகளை முடிந்த வரையில் முன்னெச்சரிக்கை நடவடிக்கை மூலம் தடுக்க முயற்சி மேற்கொள்ள வேண்டும் " என்றார்.

பின்னர் மாவட்ட அரசு தலைமை மருத்துவமனையில் டெங்கு, மலேரியா போன்ற பாதிப்புகளுக்கு மேற்கொள்ளப்பட்டுள்ள ஏற்பாடுகள் குறித்து நேரில் சென்று ஆய்வு மேற்கொண்டார்.

காய்ச்சல் பாதிப்புக்குள்ளான நோயாளிகளுக்கு தனி அறைகள் ஏற்படுத்தி கொசுவலைகள் உடன் படுக்கை வசதி, உரிய சிகிச்சை வழங்க வேண்டும் என்று கேட்டுக்கொண்டார்.

இதையும் படிங்க:விக்கிரவாண்டி இடைத்தேர்தல் - வேட்பாளர்களுக்கான சின்னம் ஒதுக்கீடு!