கோயில் பூட்டை உடைத்து உண்டியல் திருட்டு!

கிருஷ்ணகிரி: ஒசூர் சத்திய நாராயண நகர் குடியிருப்புப் பகுதியில் அமைந்துள்ள சத்திய நாராயண திருக்கோயிலில் அடையாளம் தெரியாத நபர்கள் கோயில் பூட்டை உடைத்து உண்டியலைத் திருடிச்சென்றனர்.

கிருஷ்ணகிரி மாவட்டம் ஒசூர் சத்திய நாராயண நகர் குடியிருப்புப் பகுதியில் அமைந்துள்ள சத்திய நாராயண திருக்கோயிலில் நேற்று நள்ளிரவு அடையாளம் தெரியாத நபர்கள் கோயிலின் பூட்டை உடைத்து, உண்டியலில் இருந்த பணத்தை கொள்ளை அடிக்க முயற்சி செய்துள்ளனா்.

உண்டியலை உடைக்க முடியாததால் அதனைத் தூக்கிச்சென்றுள்ளனா். இது குறித்து கோயில் நிர்வாகிகள் ஹாட்கோ காவல் நிலையத்தில் புகார் அளித்தனர். இதனையடுத்து, சம்பவ இடம் விரைந்த காவல் துறையினர், திருட்டு நடைபெற்ற கோயிலிலிருந்த தடயங்களைச் சேகரித்தனர்.

மேலும் கோயிலில் பொருத்தப்பட்டிருந்த சிசிடிவி காட்சிகளை ஆய்வுசெய்தனர். இது குறித்து வழக்குப்பதிவு செய்து காவல் துறையினர் விசாரணை நடத்திவருகின்றனர்.

கோயிலில் குடமுழுக்கு நடைபெற்று 15 நாள்களே ஆன நிலையில் திருட்டுச் சம்பவம் நடைபெற்றுள்ளது. இதனைத்தொடர்ந்து இரவு நேரத்தில் காவல் துறையினர் ரோந்துப் பணியில் ஈடுபட வேண்டும் என அப்பகுதி பொதுமக்கள் வேண்டுகோள்விடுத்துள்ளனர்.

இதையும் படிங்க: வார்த்தைகளாலும், உடலளவிலும் பெண்களை துன்புறுத்திய மதகுருக்கள்!