கம்யூனிஸ்ட் நகர செயலாளர் மீது தாக்குதல்: கட்சியினர் சாலை மறியல்

கிருஷ்ணகிரி: தேன்கனிக்கோட்டையில் இந்திய கம்யூனிஸ்ட் கட்சியின் நகர செயலாளர் மீது கொலைவெறித் தாக்குதல் நடத்தியவர்களை, கைது செய்யக்கோரி கட்சியினர் சாலை மறியலில் ஈடுபட்டனர்.

வரும் சட்டப்பேரவைத் தேர்தலில் கிருஷ்ணகிரி மாவட்டம், தளி தொகுதியில் திமுக கூட்டணி சார்பில் இந்திய கம்யூனிஸ்ட் கட்சியின் வேட்பாளாராக ராமச்சந்திரன் என்பவர் போட்டியிடுகிறார்.

இந்நிலையில் தேன்கனிக்கோட்டை பேருந்து நிலையம் அருகே அக்கட்சியின் நகர செயலாளர் சலாம் பாய் கட்சிப் பணிகளில் ஈடுபட்டு கொண்டிருந்த போது அவர் மீது முகமூடி அணிந்து இருசக்கர வாகனத்தில் வந்த நபர்கள் தாக்குதல் நடத்தி தப்பிச் சென்றனர். இந்த தாக்குதலில் பலத்த காயமைடந்த சலாம் பாய் தற்போது தனியார் மருத்துவமனையில் சிகிச்சைப் பெற்றுவருகிறார்.

இந்தத் தகவல் அறிந்து சம்பவ இடத்திற்கு வந்த இந்திய கம்யூனிஸ்ட் கட்சியினர், தாக்குதல் நடத்தியவர்களை உடனே கைது செய்யக் கோரி சாலையில் அமர்ந்து மறியலில் ஈடுபட்டனர். இதையடுத்து, தேன்கனிக்கோட்டை காவல் துறையினரின் பேச்சுவார்த்தைக்கு பின்னர் அவர்கள் கலைந்து சென்றனர்.

தளி தொகுதியில் திமுகவைச் சார்ந்தவர் சட்டப்பேரவை உறுப்பினராக உள்ள நிலையில், தற்போது கூட்டணிக் கட்சிக்கு இத்தொகுதி ஒதுக்கப்பட்டுள்ளதால் கம்யூனிஸ்ட் கட்சியினரும், திமுகவினரும் எதிரும் புதிருமாக உள்ளனர்.