கருணாநிதியின் நினைவு நாள்: சுகாதாரப் பணியாளர்களுக்கு நலத்திட்ட உதவிகள் வழங்கிய எம்.எல்.ஏ செந்தில் பாலாஜி!

கரூர்: மறைந்த திமுக தலைவர் கருணாநிதியின் நினைவு நாளை முன்னிட்டு சுகாதாரப் பணியாளர்களுக்கு நலத்திட்ட உதவிகள் வழங்கி, அரவக்குறிச்சி சட்டப்பேரவை உறுப்பினர் செந்தில் பாலாஜி சிறப்பித்தார்.

மறைந்த திமுக தலைவர் கருணாநிதியின் இரண்டாவது நினைவு தினத்தையொட்டி கரூர் மாவட்டத்தில் 4 ஆயிரத்து 300 இடங்களில், அவரது திருவுருவப் படத்தை வைத்து, திமுக தொண்டர்கள் மரியாதை செலுத்தி வருகின்றனர்.

குறிப்பாக, கருணாநிதி ஆட்சியில் மக்களுக்கு செய்த சாதனைத் திட்டங்கள் அடங்கிய பதாகைகளை கையில் ஏந்தியவாறு அஞ்சலி செலுத்தினர். கரூர் கலைஞர் அறிவாலயத்தில் மறைந்த திமுக தலைவர் கருணாநிதி உருவப் படத்திற்கு அரவக்குறிச்சி சட்டப்பேரவை உறுப்பினர் செந்தில் பாலாஜி மலர்த் தூவி அஞ்சலி செலுத்தினார்.

கருணாநிதியின் திருவுருவப் படத்திற்கு மரியாதை

இதன்பின் கரோனா வைரஸ் காலத்தில் அர்ப்பணிப்பு உணர்வோடு செயல்பட்ட செவிலியர், சுகாதாரப் பணியாளர்கள், ஆம்புலன்ஸ் ஓட்டுநர் உள்ளிட்டோருக்கு நலத்திட்ட உதவிகளை செந்தில் பாலாஜி வழங்கினார். இதனைத்தொடர்ந்து வெண்ணெய்மலையில் உள்ள அன்புக் கரங்கள் ஆதரவற்றோர் இல்லத்தில் குழந்தைகள், முதியோர்களுக்கு செந்தில் பாலாஜி உணவு வழங்கினார்.