கரூர் மாவட்டம் அரவக்குறிச்சி தொகுதி எம்எல்ஏவான செந்தில் பாலாஜியின் ஆதரவாளருக்கு சொந்தமான நிதி நிறுவனங்கள், டெக்ஸ்டைல் நிறுவனங்களில் நேற்று இரவு (மார்ச்.25) முதல் வருமான வரித்துறையினர் சோதனை மேற்கொண்டு வருகின்றனர்.
கோவையைச் சேர்ந்த 50க்கும் மேற்பட்ட வருமான வரித்துறை அலுவலர்கள் ஆறு குழுக்களாக பிரிந்து ஐந்துக்கும் மேற்பட்ட இடங்களில் சோதனை செய்து வருகின்றனர். இங்கு விடிய விடிய நடத்தப்பட்ட சோதனையில் சுமார் ஏழு கோடி ரூபாய் வரையிலான கணக்கில் வராத பணம் கைப்பற்றப்பட்டதாகக் கூறப்படுகிறது. இருப்பினும் இதுபற்றி வருமான வரி அலுவலர்களில் தரப்பினர் உறுதிப்படுத்தவில்லை.
நேற்று இரவு தொடங்கிய சோதனையானது இன்று இரண்டாவது நாளாகத் தொடர்ந்து வருகிறது. கரூர் மாவட்ட திமுக பொறுப்பாளராகவும், அரவக்குறிச்சி சட்டப்பேரவை உறுப்பினராகவும் உள்ள செந்தில் பாலாஜி வரும் தேர்தலில் கரூர் சட்டப்பேரவைத் தொகுதியில் திமுக சார்பில் போட்டியிடுகிறார்.