கரோனா அறிகுறியுடன் கரூரில் நான்கு பேர் மருத்துவமனையில் அனுமதி!

கரூரில்: கரோனா வைரஸ் தொற்று அறிகுறியுடன் நான்கு பேர் கரூர் மருத்துவக் கல்லூரி மருத்துவமனையில் அனுமதிக்கப்பட்டுள்ளதாக அம்மாவட்ட ஆட்சியர் அன்பழகன் தெரிவித்தார்.

கரோனா வைரஸ் தொற்று பரவுவதலைத் தடுக்க தமிழ்நாடு அரசு பல்வேறு முன்னெச்சரிக்கை நடவடிக்கைகளை மேற்கொண்டு வருகிறது. குறிப்பாக, கரூரில் கரோனா வைரசால் பாதிக்கப்பட்டோரைக் கண்காணித்து சிகிச்சையளிக்க வசதியாக 300 படுக்கைகள் ஏற்படுத்த தமிழ்நாடு அரசு உத்தரவிட்டது.

அதனடிப்படையில், கரூர் புதிய மருத்துவக் கல்லூரி மருத்துவமனையில் அதற்கான வசதிகள் தயார் நிலையில் உள்ளனவா? என்பதை கரூர் ஆட்சியர் அன்பழகன் ஆய்வு மேற்கொண்டார். கோவிட்-19 வைரஸ் தொற்றால் பாதிக்கப்பட்டவர்களைத் தனிமைப்படுத்தி கண்காணிக்க மருத்துவக் கல்லூரி மருத்துவமனையின் 7ஆவது மாடியில் தனி பிளாக் ஒதுக்கப்பட்டு, அதற்கான பணிகள் நடைபெற்று வருகின்றன.

இதுதொடர்பாக செய்தியாளர்களிடம் பேசிய ஆட்சியர் அன்பழகன், "இதுவரை பழைய மருத்துவக் கல்லூரி மருத்துவமனையில் இருவரும், புதிய மருத்துவக் கல்லூரி மருத்துவமனையில் இருவர் என மொத்தம் நான்கு பேர், கரோனா வைரஸ் தொற்று தடுப்புப் பிரிவில் வைத்து கண்காணிக்கப்பட்டு வருகின்றனர்.

அவர்களது ரத்த மாதிரிகளை சேகரித்து ஆய்விற்கு அனுப்பப்பட்டுள்ளன. ஆய்வின் முடிவில் அவர்களுக்கு கரோனா நோய் தொற்று இல்லை என உறுதி செய்யப்பட்ட பின்னரே, வீட்டிற்கு அவர்கள் அனுப்பி வைக்கப்படுவார்கள். நேற்று (மார்ச்-22) குளித்தளைப் பகுதியில் இருந்து 123 பேர் வந்தனர்.

அவர்களை பரிசோதித்ததில் எவ்விதப்பாதிப்பும் இல்லை என தெரியவந்தது. இருந்தபோதும் மருத்துவத் துறை அலுவலர்கள் அவர்களை தொடர்ந்து கண்காணித்து வருகின்றனர்" என்றார்.

இதையும் படிங்க:கரோனா வைரஸால் பால் உற்பத்தியில் பாதிப்பா?