இளம்பெண்ணை சீண்டிய இளைஞர் போக்சோவில் கைது!

கன்னியாகுமரி: குலசேகரபுரம் அருகே 17 வயது இளம் பெண்ணை பாலியல் தொந்தரவு செய்ததாக அதே பகுதியைச் சேர்ந்த அஜய் என்பவரை காவல் துறையினர் போக்சோ சட்டத்தில் கைது செய்துள்ளனர்.

கன்னியாகுமரி மாவட்டம் குலசேகரபுரம் அருகே கோட்டவிளையைச் சேர்ந்த மரிய செல்வன் என்பவரது மகன் அஜய் (25). இவர் அதே பகுதியைச் சேர்ந்த 17 வயது இளம் பெண்ணை ஒரு தலையாகக் காதலித்து வந்துள்ளார்.

இதனால் அப்பெண் செல்லும் இடங்களுக்கெல்லாம் சென்று, இவர் தொந்தரவு கொடுத்ததாகக் கூறப்படுகிறது. இதனை அறிந்த பெண்ணின் பெற்றோர், மகளுக்கு திருமணம் நடத்தி வைக்க முடிவெடுத்துள்ளனர். இதனையறிந்த அந்த இளைஞர், மாவட்ட குழந்தைகள் பாதுகாப்பு அதிகாரிகளுக்கு தகவல் கொடுத்து திருமணத்தைத் தடுத்துள்ளார். பின்னர் தொடர்ந்து அந்தப் பெண்ணுக்கு பாலியல் ரீதியாக தொந்தரவு அளித்துள்ளார்.

இதனையறிந்த அப்பெண்ணின் பெற்றோர், கன்னியாகுமரி அனைத்து மகளிர் காவல் நிலையத்தில் புகார் அளித்தனர். அதன்பேரில் வழக்குப்பதிவு செய்த காவல் துறையினர், அந்த இளைஞரை போக்சோ சட்டத்தின் கீழ் வழக்குப்பதிவு செய்து அவரிடம் விசாரணை நடத்தி வருகின்றனர்.

இதையும் படிங்க: கோவை இரட்டைக் கொலை வழக்கு: 4 பேருக்கு இரட்டை ஆயுள்