சிரிப்பால் அனைவரையும் கவர்ந்த வைரல் மூதாட்டி: ஸ்டாலின் ட்வீட்

கரோனா நிவாரண நிதி பெற்று ரூபாய் நோட்டுடன் இன்று இணையத்தில் வலம் வந்த மூதாட்டி ஒருவரின் புகைப்படம் குறித்து மு.க. ஸ்டாலின் ட்வீட் செய்துள்ளார்.

கன்னியாகுமரி:குமரி மாவட்டம் நாகர்கோவில் எடுத்த கலுங்கடி பகுதியைச் சேர்ந்தவர் வேலம்மாள் (85). இவருக்கு ஒரு மகனும், மகளும் உள்ளனர். மகளுக்கு திருமணமாகி வெளியூரில் உள்ளார். மகன் உள்ளூரில் கூலி வேலை பார்த்து வரும் சூழலில், வேலம்மாள் தனியாக வீட்டு திண்ணையில் வசித்துவருகிறார்.

இந்நிலையில், தமிழ்நாடு முதலமைச்சர் மு.க. ஸ்டாலின் வழங்கிய கரோனா நிவாரண நிதி ரூ. 2,000 இன்று பெற்ற அவர், ரூபாய் நோட்டை கையில் பிடித்தபடி அவர் சிரித்த முகத்துடன் இருந்த புகைப்படம் சமூக வலைதளங்களில் வைரலானது.

வாயில் பல்லில்லாமல், நெற்றியில் சுருக்கங்களுடன் கைத்தடியைப் பிடித்தவாறு இருந்த அந்த மூதாட்டியின் புகைப்படத்தை பலரும் தங்களது சமூகவலைதளங்களில் பதிவிட்டு சிலாகித்தவண்ணம் உள்ளனர்.

இந்தப் புகைப்படத்தை பார்த்த தமிழ்நாடு முதலமைச்சர் மு.க. ஸ்டாலின், இந்த ஏழைத்தாய்மார்களின் சிரிப்பே, நமது அரசின் சிறப்பு என்று ட்வீட் செய்துள்ளார்.

இதையும் படிங்க: ’தமிழ்நாடு முன்னேற ஏழு இலக்குகள்’ - மாவட்ட ஆட்சியர்களுக்கு அறிவுறுத்திய முதலமைச்சர் ஸ்டாலின்