நாங்குநேரி தொகுதியில் காங்கிரஸ் போட்டியா? - வசந்தகுமார் விளக்கம்!

சென்னை: "நாங்குநேரி சட்டப்பேரவைத் தொகுதியில் காங்கிரஸ் போட்டியிடுவது குறித்து கூட்டணி கட்சிகளுடன் ஆலோசித்த பிறகு முடிவெடுக்கப்படும்" என்று, கன்னியாகுமரி மக்களவை உறுப்பினர் வசந்தகுமார் தெரிவித்துள்ளார்.

கன்னியாகுமரி மக்களவை உறுப்பினர் வசந்தகுமார் செய்தியாளர்களை இன்று சென்னையில் சந்தித்தார். நாங்குநேரி இடைத்தேர்தலில் போட்டியிடபோவது யார் என செய்தியாளர் எழுப்பிய கேள்விக்கு, "நாங்குநேரி தொகுதியில் காங்கிரஸ் தான் போட்டியிட வேண்டும் என்று நாங்கள் நினைக்கிறோம். இதைப்பற்றி தமிழ்நாடு காங்கிரஸ் கமிட்டி, அகில இந்திய காங்கிரஸ் கமிட்டி, கூட்டணி கட்சியான திமுக ஆகியவை கூடி பேசி முடிவெடுப்பார்கள்" என்றார்.

நம்பிக்கை இல்லா தீர்மானம் குறித்த செய்தியாளர் எழுப்பிய கேள்விக்கு, "பாஜக கூட்டணியில் அதிமுக இருப்பதால் சபாநாயகர் மீது கொண்டுவரப்பட்டுள்ள நம்பிக்கை இல்லா தீர்மானம் தோல்வி அடையலாம். பணபலம், படைபலத்தை வைத்து நம்பிக்கையில்லா தீர்மானத்தை அதிமுக முறியடிப்பார்கள்" என பதிலளித்தார்.

இந்தி திணிப்பு குறித்து கேள்விக்கு, "இந்தி திணிப்பு மட்டுமன்றி எல்லா விவகாரத்திலும் தேவையில்லாத ஒன்றை திணித்து பிறகு பின் வாங்குவதுதான் பாஜகவின் வேலை. இந்தியை படிக்காதே என்று காங்கிரஸ் சொல்லவில்லை. இந்தியை திணிக்காதே என்று தான் சொல்கிறோம்" என்று தெரிவித்தார்.