அய்யா வைகுண்டரின் 188ஆவது அவதார விழா

கன்னியாகுமரி: நாகர்கோவிலிலிருந்து சுவாமிதோப்பு தலைமை பதி வரை நடைபெற்ற பிரமாண்ட பேரணியில் பல்லாயிரக்கணக்கான அய்யா வழி பக்தர்கள் பங்கேற்றனர்.

கன்னியாகுமரி மாவட்டம் சுவாமிதோப்பு தலைமை பதியில் அய்யா வைகுண்டரின் 188ஆவது அவதார தினவிழா வெகு விமரிசையாக கொண்டாடப்பட்டு வருகிறது. இதையொட்டி, இன்று காலை நாகர்கோவிலில் உள்ள நாகராஜா திடலிலிருந்து புறப்பட்ட பேரணியில் காவி கொடி ஏந்திய பல்லாயிரக்கணக்கான அய்யா வழி பக்தர்களும், முத்துக்குடை ஏந்திய பெண்களும், 1000க்கும் மேற்பட்ட வாகனங்களும் அணிவகுத்து சென்றன.

மேலும், பேரணியில் நடைபெற்ற சிறுவர் சிறுமியரின் கோலாட்ட நிகழ்ச்சிகளையும் அனைவரும் பார்த்து ரசித்தனர். இப்பேரணியின் போது 'அய்யா! ஹர ஹர சிவனே' என்ற நாமத்தையும் உச்சரித்தபடியே சென்ற பக்தர்கள், நடைபயணமாக தலைமை பதியான சுவாமிதோப்புக்கு சென்றனர்.

இந்த நடைபயணத்தில் கன்னியாகுமரி மட்டுமின்றி நெல்லை, தூத்துக்குடி, கேரளாவிலிருந்தும் பல்லாயிரகணக்கான மக்கள் பங்கேற்றனர். இந்நாளில் குமரி மாவட்டத்திற்கு உள்ளூர் விடுமுறை அறிவிக்கப்பட்டுள்ளது குறிப்பிடத்தக்கது.

இதையும் படிங்க:சகோதரியிடம் அத்துமீறிய நண்பனை கூட்டாளிகளுடன் இணைந்து தீர்த்துக்கட்டிய அண்ணன்!