காஞ்சிபுரம் மாவட்டத்தில் கரோனா வைரஸ் நோய்த் தொற்று பரவாமல் தடுக்க பல்வேறு முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன. பொது இடங்களில் கை கழுவுவதற்கு குழாய்கள் அமைப்பது, நகர் முழுவதும் கிருமிநாசினி திரவம் தெளிப்பது உள்ளிட்ட பல்வேறு நடவடிக்கைகளை மாவட்ட நிர்வாகம் மேற்கொண்டு வருகிறது.
எனினும் காய்கறிச் சந்தை, மளிகைப் பொருள்கள் வாங்கும் இடம் உள்ளிட்ட இடங்களில் அதிக மக்கள் கூடுவதால் நோய்த் தொற்று பரவும் அபாயம் நிறைய உள்ளது. இதனைக் கருத்தில் கொண்டு காஞ்சிபுரம் மாவட்ட நிர்வாகம் உத்தரவின் பேரில் காஞ்சிபுரம் பெருநகராட்சி நிர்வாகம் சார்பில் காஞ்சிபுரம் தற்காலிக காய்கறிச் சந்தை, மளிகைப் பொருட்கள் விற்பனை கூடம் ஆகிய 3 இடங்களில் கிருமிநாசினி திரவம் தெளிக்கும் சுரங்கப் பாதைகளை அமைத்துள்ளது.