காஞ்சிபுரம்: இந்தியாவில் அவதரித்த மகான்களில் மிக முக்கியமானவர் ஆதி சங்கரர். இவர் ஏழாம் நூற்றாண்டில் இன்றைய கேரள மாநிலத்தின் காலடி என்ற ஊரில் பிறந்தார். இந்து மதம் பல பிரிவுகளாகப் பிளவுபட்டிருந்த காலத்தில் அவற்றை ஒன்றாக்கி, வழிபாட்டு நெறிமுறைகளை உருவாக்கியவர் ஆதி சங்கரர்.
அத்வைதத்தை உலகுக்கு எடுத்துக் காட்டியவர். இளமைப் பிராயத்தில் கௌடபாதரின் சீடரான கோவிந்த பகவத்பாதரிடம் வேதாந்தம் மற்றும் இதர தத்துவங்கள் பயின்று சங்கர பகவத்பாதர் என்று அழைக்கப்பட்டார். மேலும் இந்து சமயத்தின் 3 அடிப்படை நூல்கள் என்று அறிப்படும் பத்து உபநிடதங்கள், பிரம்ம சூத்திரம் மற்றும் பகவத் கீதைக்கு விளக்கவுரை ஆகியவற்றை அளித்து, அவை போதிக்கும் அத்வைத வேதாந்தம் அதாவது இரண்டற்றது என்கிற அத்வைத தத்துவத்தை உலகத்துக்கு எடுத்துக்காட்டியவர்.
மேலும் விஷ்ணு சஹஸ்ரநாமம் போன்ற சமய நூல்களுக்கும் இவர் விளக்கவுரை நிறுவியுள்ளதாக பொதுக் கருத்து உள்ளது. சிவானந்த லஹரி, கோவிந்தாஷ்டகம், பஜ கோவிந்தம், சித்தாந்த சாங்கியம், விவேகசூடாமணி, ஆத்மபோதம், உபதேச சாஹஸ்ரி, கனகதாரா ஸ்தோத்திரம், சுப்ரஹ்மண்ய புஜங்கம் போன்ற நூல்களை இயற்றியுள்ளார்.