கிராம சபை கூட்டத்தில் இவ்வளவு பெண்கள் இருப்பீங்க என தெரிந்திருந்தால் இன்னும் கொஞ்சம் அதிகமாக மேக்கப் போட்டு வந்திருப்பேன் என மு.க.ஸ்டாலின் கூறுவதெல்லாம், ஒரு தலைவர் பேசுகிற பேச்சா என காஞ்சிபுரத்தில் அதிமுக சார்பில் நடைபெற்ற மொழி போர் தியாகிகள் வீரவணக்க நாள் பொது கூட்டத்தில் பங்கேற்ற முன்னாள் அமைச்சர் கோகுல இந்திரா கடும் விமர்சனம் செய்துள்ளார்.
தமிழ்நாட்டில் நடைபெற்ற இந்தி திணிப்பு எதிர்ப்புப் போராட்டங்களில் ஈடுபட்டு உயிரிழந்தவர்களை பெருமைப்படுத்தும் விதமாக மொழிப்போர் தியாகிகள் வீரவணக்க நாள் அதிமுக சார்பில் ஆண்டுதோறும் அனுசரிக்கப்பட்டு வருகிறது. அதன்படி காஞ்சிபுரம் மாவட்ட அதிமுக மாணவர் அணி சார்பில், மொழிப்போர் தியாகிகளுக்கு மரியாதை செலுத்தும் வீரவணக்க நாள் பொதுக்கூட்டம் காஞ்சிபுரம் வணிகர் வீதியில் முன்னாள் அமைச்சர் வி.சோமசுந்தரம் தலைமையில் நடைபெற்றது.
பொதுக்கூட்டத்தில் முன்னாள் அமைச்சரும், அதிமுக செய்தி தொடர்பாளரும், காஞ்சிபுரம் மாவட்ட தேர்தல் பொறுப்பாளருமான கோகுல இந்திரா கலந்துகொண்டு மொழிப்போர் தியாகிகளுக்கு மலர் தூவி மரியாதை செலுத்தி பெருமைப்படுத்தி சிறப்புரையாற்றினார்.