காஞ்சிபுரம்-செங்கல்பட்டு ஒருங்கிணைந்த மாவட்டத்தில் 750 ஏரிகள் முழு கொள்ளளவை எட்டின

காஞ்சிபுரம்: மாவட்டத்தில் தொடர்ந்து சில நாட்களாகப் பெய்து வரும் கன மழையினால் காஞ்சிபுரம் - செங்கல்பட்டு ஒருங்கிணைந்த மாவட்டத்தில் 750 ஏரிகள் 100 விழுக்காடு கொள்ளளவை எட்டியுள்ளதாக பொதுப்பணித் துறை தெரிவித்துள்ளது.

கடந்த சில நாட்களாகப் பெய்து வரும் கனமழையின் காரணமாக ஏரிகள் மாவட்டம் என்றழைக்கப்படும் ஒருங்கிணைந்த காஞ்சிபுரம் மற்றும் செங்கல்பட்டு மாவட்டத்தில் பொதுப்பணித் துறை கட்டுப்பாட்டில் 909 ஏரிகள் உள்ளன. இதில் 750 ஏரிகள் 100 விழுக்காடு கொள்ளளவை எட்டியுள்ளது. இதில் காஞ்சிபுரம் மாவட்டத்தில் 295 ஏரிகளும், செங்கல்பட்டு மாவட்டத்தில் 455 ஏரிகள் என 750 ஏரிகள் முழு கொள்ளளவை எட்டி உள்ளன.

காஞ்சிபுரம் மாவட்டத்தில் 66 ஏரிகளும், செங்கல்பட்டு மாவட்டத்தில் 73 ஏரிகள் 75 விழுக்காடு கொள்ளளவையும், காஞ்சிபுரம் மாவட்டத்தில் 20 ஏரிகள் 50 விழுக்காடு கொள்ளளவையும் எட்டியுள்ளது. காஞ்சிபுரம் செங்கல்பட்டு ஒருங்கிணைந்த மாவட்டங்களில் 16 ஏரிகள் மிகப்பெரிய ஏரிகளாக உள்ளன. இதில் காஞ்சிபுரம் மாவட்டத்தில் முதன்மையானதாக தென்னேரி ஏரி உள்ளது. இந்த ஏரியின் 18 அடி ஆழத்தில் 1 டி.எம்.சி தண்ணீரை தேக்க முடியும். ஏரியின் முழு கொள்ளளவான 18 அடியும் தற்போது நிரம்பி ஏரி முழு கொள்ளளவை எட்டி உபரி நீர் வெளியேற்றப்பட்டுவருகிறது.

மேலும், காஞ்சிபுரம் மாவட்டத்தில் மிகப்பெரிய ஏரியான தாமல் ஏரி 18.60 அடி ஆழம் கொள்ளளவு கொண்டதில் 14.50 அடி ஆழம் நீர் நிரம்பியுள்ளது.

அதேபோல் 20 அடி கொள்ளளவு கொண்ட உத்திரமேரூர் பெரிய ஏரியில் 11.50 அடி நீர் நிரம்பியுள்ளது. 17.60 அடி கொள்ளளவை கொண்ட ஸ்ரீபெரும்புதூர் ஏரி முழு கொள்ளளவை எட்டி உபரி நீர் வெளியேறுகிறது. அதேபோல் 18.40 அடி கொள்ளளவு கொண்ட மணிமங்கலம் ஏரியும் முழு கொள்ளவை எட்டியுள்ளது. மேலும் 13.20 அடி கொள்ளளவு கொண்ட பிள்ளைப்பாக்கம் ஏரியில் 13 அடி நீர் நிரம்பியுள்ளதாக பொதுப்பணித் துறை தெரிவித்துள்ளது.