கள்ளக்குறிச்சி:சின்னசேலம் அருகே கனியாமூர் தனியார் பள்ளி மாணவி மரணத்தைத்தொடர்ந்து நடந்த கலவரத்தின்போது, அப்பள்ளி தாளாளர் வீட்டில் இருந்த 300 சவரன் நகைகள் மற்றும் ரூ.50 லட்சம் ரொக்கம் கொள்ளை போனதாக விசாரணையில் தெரியவந்துள்ளதாக சிபிசிஐடி வட்டாரங்கள் தெரிவித்தன. இதில் தொடர்புடைய சிறுவன் ஒருவனை பிடித்து, விசாரித்து வருகின்றனர்.
கள்ளக்குறிச்சி மாவட்டம், சின்னசேலம் அருகே கனியாமூர் தனியார் பள்ளியின் விடுதியில் தங்கிப்படித்த பிளஸ்-2 மாணவி ஒருவர், கடந்த ஜூலை 13-ம் தேதி சந்தேகத்திற்குரிய முறையில் உயிரிழந்தார். இதைத்தொடர்ந்து ஜூலை 17-ம் தேதி அந்த மாணவியின் மரணத்துக்கு நீதி கேட்டு சில அமைப்பினர் போராட்டத்தில் ஈடுபட, அது கலவரமாக வெடித்தது. இந்த கலவர வழக்கில் 306 பேர் மீது சின்னசேலம் போலீஸாரும், 107 பேர் மீது சிறப்பு புலனாய்வுக்குழு போலீஸாரும் வழக்குப்பதிவு செய்து, 413 பேரை கைதுசெய்து சிறையில் அடைத்தனர். இதில் 13 பேர் மீது குண்டர் தடுப்புச்சட்டத்தின்கீழ் நடவடிக்கை எடுக்கப்பட்டுள்ளது.