மோடி பெயரில் மோசடி: 5 பேர் கைது!

ஈரோடு: பவானி அருகே பிரதமர் மோடி பெயரில் வீடு கட்டித் தருவதாகக் கூறி கிராம மக்களிடம் மோசடியில் ஈடுபட்ட வழக்கறிஞர், இரண்டு பெண்கள் உட்பட 5 பேரை கிராம மக்கள் பிடித்து காவல் துறையினிரிடம் ஒப்படைத்தனர்.

ஈரோடு மாவட்டம் பவானி அருகே உள்ள தொட்டியபாளையம் அடுத்துள்ள பனங்காட்டு காலனி பகுதியைச் சேர்ந்த பட்டியலின மக்களிடம் பிரதமர் மோடி பெயரில் அனைவருக்கும் வீடு திட்டத்தின் கீழ் வீடு கட்டித் தருவதாகக் கூறி, மக்களை ஏமாற்றி ஐந்து பேர் கொண்ட கும்பல் அவர்களிடம் பணம் வாங்கியுள்ளது. அந்தக் கும்பல் கடந்த ஒரு ஆண்டுக்கு முன்பு கிராம மக்களிடம் ஆயிரத்து 500 ரூபாய் பெற்றுச் சென்றுள்ளது.

இதுவரை எத்தகைய உதவியும் கிராம மக்களுக்கு கிடைக்காத நிலையில் இன்று மீண்டும் ஐந்து பேர் கொண்ட கும்பல் கிராம மக்களை சந்தித்துள்ளனர். அப்போது, தலா ஐந்தாயிரம் ரூபாய் அதோடு உங்களது அசல் வங்கி கணக்கு புத்தகத்தையும் கொடுங்கள், விரைவில் உங்களுக்கு பணம் வர நடவடிக்கை எடுக்கப்படும் என்று தெரிவித்துள்ளனர்.

இதை கேட்டதும் சந்தேகம் அடைந்த கிராம மக்கள் அவர்கள் வந்த வாகனத்தை முற்றுகையிட்டு, மோசடியில் ஈடுபட்ட கும்பலை பிடித்து பவானி காவல் துறையினரிடம் ஒப்படைத்தனர்.

இதனையடுத்து காவல் துறையினர் விசாரணை மேற்கொண்டதில், வழக்கறிஞர் தட்சிணாமூர்த்தி, சித்தேஸ்வரன், மணி, நிர்மலா, ராதா ஆகியோர் என்பது தெரியவந்தது. மேலும் தமிழ்நாட்டின் பல்வேறு பகுதிகளில் அனைவருக்கும் வீடு என்கிற திட்டத்தின் கீழ் பணம் பெற்று தருவதாக மோசடியில் ஈடுபட்டுள்ளதும் தெரியவந்துள்ளது.