அரசு மருத்துவமனையில் கொரோனோ பரிசோதனை செய்ய மறுப்பு: முதலமைச்சருக்குப் பறந்த மின்னஞ்சல்

ஈரோடு: பெருந்துறை அரசு மருத்துவமனையில், தனக்கு கொரோனா பரிசோதனை செய்ய மறுப்பதாக நெகிழி மொத்த வியாபாரத் தொழில்செய்யும் தொழிலதிபர் குற்றஞ்சாட்டியுள்ளார்.

ஈரோடு அடுத்துள்ள கொல்லம்பாளையம் பகுதியைச் சேர்ந்த தொழிலதிபர் ஜிப்ரி, நெகிழி மொத்த வியாபாரத் தொழில் செய்துவருகிறார். இவர் கடந்த 4ஆம் தேதி டெல்லியில் நடைபெற்ற தொழில் தொடர்பான கண்காட்சிக்கு விமானம் மூலமாக சென்று பின்னர் ஈரோடு திரும்பியுள்ளார். விமானத்தில் சென்று திரும்பிய நாள் முதல் அவருக்குத் தொடர்ந்து காய்ச்சல், இருமல், மூட்டுவலி, தலைவலி இருந்துள்ளது.

இதனைத் தொடர்ந்து தொழிலதிபர் ஜிப்ரி பெருந்துறை அரசு மருத்துவமனையில் ஏற்படுத்தப்பட்டுள்ள கொரோனோ சிறப்பு வார்டில் தன்னைப் பரிசோதனை செய்யும்படி மருத்துவர்களிடம் கூறியுள்ளார். ஆனால் ஜிப்ரியை பரிசோதனை செய்யாமல் திருப்பி அனுப்பிய மருத்துவர்கள் சாதாரண காய்ச்சல்தான் என்று கூறி மூன்று நாள்களுக்குப் பின்னர் வருமாறு கூறி அனுப்பியுள்ளனர். இதன்பின்னர் ஜிப்ரிக்கு தொடர்ந்து காய்ச்சல், இருமல், மூட்டுவலி, தலைவலி இருந்துள்ளது.

இதனால் அச்சமடைந்த ஜிப்ரி தொழில் நிமித்தமாகக் கோவை சென்றபோது கோவை அரசு மருத்துவமனையில் உள்ள கொரோனோ சிறப்பு வார்டில் பரிசோதனை செய்ய சென்றபோது வெளிநாட்டிலிருந்து வருபவர்களுக்கு மட்டும்தான் சிகிச்சையளிக்க உத்தரவு உள்ளதாக மருத்துவர்கள் கூறியுள்ளனர்.

ஜிப்ரியின் தொடர் வலியுறுத்தலுக்குப் பின்பு ரத்தம் மாதிரியை பரிசோதனை எடுக்க அனுமதியளித்துள்ளனர். ஆனால் ரத்த மாதிரியை எடுக்கவந்த மருத்துவமனை செவிலியர் போதிய மருத்துவ உபகரணங்கள்கூட இல்லாமல் எடுத்ததைக் கண்டு அதிர்ச்சியடைந்த ஜிப்ரி தனக்கு கொரோனோவாக இருந்தால் இப்படித்தான் ரத்த மாதிரியை பரிசோதனைக்கு எடுப்பீர்களா என்று மருத்துவமனை செவிலியரிடம் கேட்டுள்ளார்.

அதற்குப் பதிலளித்த மருத்துவமனை செவிலியர், 'மருத்துவமனையில் போதிய உபகரணங்கள் தற்போது இல்லை, நாங்கள் என்ன செய்வது?' என்று கூறியுள்ளனர். இதனைத் தொடர்ந்து தனக்கு ஏற்பட்ட கொரோனோ அச்சத்தால் ஏற்பட்ட அனுபவங்கள் என்ற பதிவையும் தொழில் அதிபர் வாட்ஸ்அப் மூலமாகச் சமூக வலைதளங்களில் அனுப்பிவருகின்றார்.

பெருந்துறை போக்குவரத்து மருத்துவக்கல்லூரி அரசு மருத்துவமனையில் ஏற்படுத்தப்பட்டுள்ள கொரோனோ சிறப்பு வார்டில் போதிய பாதுகாப்பு உபகரணங்கள் இல்லை என்று கடந்த சில மாதங்களுக்கு முன்பு சீனா சென்று திரும்பிய பெருந்துறையைச் சேர்ந்த விஸ்வநாதன் என்பவர் சிகிச்சைப் பிரிவிலிருந்து யாரிடமும் சொல்லாமல் தனது வீட்டிற்குச் சென்ற நிலையில் தற்போது தொழிலதிபர் ஒருவர் அதே குற்றச்சாட்டை முன்வைத்துள்ளார்.

கொரோனோ சிகிச்சை தொடர்பாக மருத்துவமனையில் போதிய பாதுகாப்பு உபகரணங்கள் வேண்டும் என்று தமிழ்நாடு முதலமைச்சர் மற்றும் மக்கள் நல்வாழ்வுத் துறை அமைச்சர், கோவை, ஈரோடு மாவட்ட ஆட்சியர்களுக்கும் மின்னஞ்சல் மூலமாகத் தனது புகாரை தெரிவித்துள்ளதாகவும் ஜிப்ரி தெரிவித்துள்ளார்.

இதையும் படிங்க:அதிர்ச்சி: கொரோனா வைரஸால் இந்தியாவில் முதல் உயிரிழப்பு!