ஈரோடு கிழக்கு தொகுதி இடைத்தேர்தல் - அடிப்படை வசதிகள் வேண்டி எஸ்டிபிஐ நடத்திய போராட்டம்

ஈரோடு கிழக்கு தொகுதி இடைத்தேர்தல் நடைபெறும் இடத்தில் வாக்காளர்களுக்கு போதுமான அடிப்படை வசதிகள் செய்து தரவில்லை என கோரி எஸ்டிபிஐ கட்சியினர் மறியல் போராட்டத்தில் ஈடுபட்டதால் பெரும் பரபரப்பு ஏற்பட்டது.

ஈரோடு கிழக்கு தொகுதி இடைத்தேர்தலில் வாக்குப்பதிவு இன்று (பிப்.27) காலை 7 மணி முதல் தொடங்கி விறுவிறுப்பாக நடைபெற்றது. இந்நிலையில் தேர்தல் நடைபெறும் தொகுதிக்கு உட்பட்ட காமராஜர் அரசு உயர் நிலைப்பள்ளியில் வாக்காளர்களுக்கு போதுமான குடிநீர், சாமியானா பந்தல் உள்ளிட்ட அடிப்படை வசதிகள் இல்லை என குற்றம்சாட்டப்படுகிறது.

மேலும், மாற்றுத்திறனாளிகளுக்கு வாக்கு செலுத்த சக்கர நாற்காலி வசதி கூட இல்லை என கூறி எஸ்டிபிஐ கட்சியினர் வாக்குச்சாவடி முன்பு மறியல் போராட்டத்தில் ஈடுபட்டனர். தொடர்ந்து வாக்குப்பதிவினை காலதாமதம் செய்யாமல், வாக்காளர்களுக்குப் போதுமான அடிப்படை வசதிகள் செய்து தரக்கோரி முழக்கங்களை எழுப்பினர்.

இதன் பின்னர் தேர்தல் பாதுகாப்புப் பணியில் ஈடுபட்ட காவல் துறையினர் பேச்சுவார்த்தை நடத்தி சமாதானம் செய்தனர். இதையடுத்து போராட்டத்தை தடுக்கும் வகையில் துணை ராணுவப்படையினர் பாதுகாப்பு பணிக்காக வந்தனர். இதையடுத்து வாக்காளர்களுக்குப் போதுமான அடிப்படைப்பணிகள் மேற்கொள்ளப்பட்டு வாக்குப்பதிவு தொடர்ந்து நடைபெற்று முடிந்தது.

இதையும் படிங்க:Erode East Live Update: 3 மணி நிலவரப்படி 59.28% வாக்குப்பதிவு