நகர்ப்பகுதிக்குள் புகுந்த காட்டு யானைகள் அட்டகாசம் - பொதுமக்கள் அச்சம்!

ஈரோடு: காட்டு யானைகள் நகர்ப்பகுதிக்குள் புகுந்து தங்கும் விடுதியின் சுற்றுச்சுவரை இடித்து சேதப்படுத்தி உள்ள சம்பவம் பொதுமக்களிடையே அச்சத்தை ஏற்படுத்தியுள்ளது.

ஈரோடு மாவட்டம், சத்தியமங்கலம் புலிகள் காப்பகத்தில் உள்ள விளாமுண்டி வனப்பகுதியில் 20க்கும் மேற்பட்ட காட்டு யானைகள் உள்ளன. இந்த யானைகள் இரவு நேரத்தில் வனத்தை விட்டு வெளியேறி, வனப்பகுதியை ஒட்டி அமைந்துள்ள கிராமங்களில் புகுந்து, விவசாயிகள் பயிரிட்டுள்ள வாழை, கரும்பு உள்ளிட்ட பயிர்களை சேதப்படுத்துவது தொடர்கதையாகி உள்ளன.

இந்நிலையில், அதிகாலை விளாமுண்டி வனப்பகுதியை விட்டு வெளியேறிய நான்கு காட்டு யானைகள் பவானிசாகர் நகர்ப்பகுதிக்குள் புகுந்தன. யானைகள் ஊருக்குள் வருவதைக்கண்டு பொதுமக்கள் அச்சமடைந்தனர்.

இது குறித்து, உடனடியாக வனத்துறையினருக்குத் தகவல் தெரிவித்தனர். இதனிடையே, யானைகள் அப்பகுதியில் உள்ள பொதுப்பணித்துறைக்குச் சொந்தமான தங்கும் விடுதிக்குச் சென்று, அங்குள்ள சுற்றுச்சுவரை இடித்துத் தள்ளி சேதப்படுத்தின.

பின்னர் சம்பவ இடத்திற்கு வந்த வனத்துறையினர் பட்டாசுகளை வெடித்து யானைகளை விரட்டியடித்தனர். யானைகள் ஊருக்குள் புகுந்த சம்பவம் அப்பகுதி பொதுமக்களிடையே அச்சத்தை ஏற்படுத்தியுள்ளது.

மேலும் இரவு நேரத்தில் வனத்துறையினர் ரோந்துப்பணியை தீவிரப்படுத்தி, யானைகள் ஊருக்குள் புகுவதைத் தடுக்க நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.

இதையும் படிங்க:குன்னூர் ஹில்கிரோவில் முகாமிட்ட யானைக் கூட்டம் - வைரல் காணொலி!