புதிய பாலத்திற்கான பணி தீவிரம்

ஈரோடு: பவானிசாகர் அணை முன்பு அமைந்துள்ள ஆற்றின் குறுக்கே புதிய பாலம் கட்டுவதற்கான மண்பரிசோதனை செய்யும் பணி தீவிர படுத்தியுள்ளது.

சத்தியமங்கலம் அடுத்த உள்ள பவானிசாகர் அணை கட்டுமான பணியின்போது கட்டுமானப் பொருள்கள் எடுத்து செல்வதற்காக பவானிஆற்றின் குறுக்கே உயர்மட்ட பாலம் கட்டப்பட்டது. அணை முழுகொள்ளளவை எட்டும்போது 8 மதகுகள் வழியாக திறந்து விடப்படும் வெள்ளநீர், இந்த பாலத்தின் வழியாக பாய்ந்து ஓடும்.

இந்த ஆற்றுப்பாலம் பழுதடைந்தததால் கடந்த ஆண்டு ஏப்ரல் மாதம் முதல் வாகனப் போக்குவரத்திற்கு தடைசெய்யப்பட்டது. இதனால் வாகனங்கள் தொட்டம்பாளையம் ஆற்றுப்பாலம் வழியாக திருப்பி விடப்பட்டதால் புங்கார், பெரியார்நகர், காராச்சிக்கொரை உள்ளிட்ட பல கிராமங்களை சேர்ந்த பொதுமக்கள் பவானிசாகர் செல்ல பலகிலோமீட்டர் தூரம் சுற்றி செல்லவேண்டிய நிலைக்கு தள்ளப்பட்டுள்ளனர்.

பாலம் பழுதடைந்து ஓராண்டு ஆகியும் புதிய பாலம் கட்டும் பணிகள் தொடங்காததால் பள்ளி, கல்லூரி செல்லும் மாணவ மாணவியரும், அவசர சிகிச்சைக்காக மருத்துவமனைக்கு குறித்த நேரத்தில் செல்லமுடிவதில்லை. உடனடியாக பாலம் கட்டுவதற்கான டெண்டர் விடப்பட்டு பணியை தொடங்க வேண்டும் என்று பவானிசாகர் அணை சுற்றுவட்டார கிராமங்களை சோந்த பொதுமக்கள் கோரிக்கை விடுத்துள்ளனர்.

பழுதடைந்த பாலத்திற்கு பதிலாக புதிய பாலம் கட்ட ரு.8 கோடி நிதி ஒதுக்கப்பட்டுள்ளதாக நெடுஞ்சாலைத்துறை அலுவலர்கள் தெரிவித்தனர். தற்போது, பவானி ஆற்றின் குறுக்கே புதிய பாலம் கட்ட மண்பரிசோதனை செய்யும் பணி தீவிரப் படுத்தியுள்ளது.