பண்ணாரி அம்மன் கோயில் குண்டம் விழா: உண்டியல் காணிக்கை ரூ.85 லட்சம் வசூல்

ஈரோடு: பண்ணாரி அம்மன் கோயிலில் நடைபெற்ற குண்டம் விழாவையொட்டி கோயில் உண்டியலில் காணிக்கையாக 85 லட்சம் ரூபாய் கிடைத்துள்ளது.

தமிழ்நாட்டில் பிரசித்திப் பெற்ற பண்ணாரி அம்மன் கோயில் குண்டம் விழா கடந்த மார்ச் 15ஆம் தேதி பூச்சாட்டுதலுடன் தொடங்கியது. விழாவையொட்டி கோயிலில் 15 நாள்கள் சிறப்பு வழிபாடுகள், பூஜைகள், ஆராதனைகள் நடைபெற்றன. அதனைத் தொடர்ந்து கடந்த 30ஆம் தேதி குண்டம் விழாவில் பூசாரி மட்டும் குண்டம் இறங்கினார்.

குண்டம் விழாவில் லட்சக்கணக்கான பக்தர்கள் கலந்துகொண்டு அம்மனை வழிபட்டனர். விழாவையொட்டி கோயிலில் வைக்கப்பட்ட தற்காலிகமான ஆறு உண்டியல்கள், நிரந்தர 20 உண்டியல்கள் என 26 உண்டியல்கள் இணை ஆணையாளர் சபர்மதி தலைமையில் பரம்பரை அறங்காவலர்கள் முன்னிலையில் திறக்கப்பட்டன.

அதனைத் தொடர்ந்து அலுவலர்கள் முன்னிலையில் உண்டியல் காணிக்கை நேற்று (ஏப். 8) எண்ணப்பட்டது. இதில் கல்லூரி மாணவர்கள் கலந்துகொண்டனர்.

உண்டியலில் மொத்தம் 85 லட்சத்து 20 ஆயிரத்து 35 ரூபாயும், 511 கிராம் தங்கம், 933 கிராம் வெள்ளிப்பொருள்கள் கிடைத்துள்ளன. கடந்தாண்டு கரோனா பரவல் நோய்த்தடுப்பு காரணமாக குண்டம் விழா நடைபெறவில்லை என்பது குறிப்பிடத்தக்கது.

இதையும் படிங்க:முகக்கவசம் அணிந்து வந்தால் மட்டுமே பெட்ரோல் - பெட்ரோலிய வணிகர்கள் சங்கம்