திம்பம் மலைப்பாதையில் கடும் பனி மூட்டம்: வாகன ஓட்டிகள் அவதி!

ஈரோடு: சத்தியமங்கலம் அருகேயுள்ள திம்பம் மலைப்பாதையில் இன்று காலை கடுமையான பனி மூட்டம் நிலவியதால் வாகன ஓட்டிகள் முகப்பு விளக்குகளை எரியவிட்டவாறு வாகனங்களை மெதுவாக இயக்கினர்.

சத்தியமங்கலம் புலிகள் காப்பகம் பகுதியில் கடந்த சில நாட்களாக பெய்த மழையால் அப்பகுதி குளிர்ந்து இதமான கால நிலை நிலவுகிறது. இந்நிலையில், திம்பம் மலைப்பாதையில் இன்று காலை முதலே கடும் பனி மூட்டம் நிலவியது.

27 கொண்டை ஊசி வளைவுகளைக் கொண்ட இம்மலைப்பாதையில், 20ஆவது கொண்டை ஊசி வளைவு வரை எதிரே வரும் வாகனங்கள் தெரியாத அளவிற்கு பனி மூட்டம் இருந்தது. இதனால், வாகன ஓட்டிகள் முகப்பு விளக்குகளை எரியவிட்டபடி வாகனங்களை மெதுவாக இயக்கினர்.

இதன் காரணமாக, வாகன ஓட்டிகளுக்கு பண்ணாரியிலுருந்து ஆசனூர் வரை செல்லும் பயண நேரம் அதிகரித்துள்ளது. மேலும், வனத்துறையினர் வாகனங்களை மொதுவாக இயக்குமாறு அறிவுறுத்தியுள்ளனர்.

இதையும் படிங்க:மோடியை ஹிட்லருடன் ஒப்பிட்ட ஜெர்மனி மாணவர்; திருப்பி அனுப்பிய இந்தியா!